AHATA: A discuti oportunidadnan pa traha hunto den prohibicion di saco di plastic

Recientemente e directiva di Aruba Hotel and Tourism Association (AHATA) a reuni cu Parlamentario Ing. Donny Rasmijn y e team di Gobierno encarga cu e proyecto di introduccion di e ley di prohibicion di saco di plastic. E hunta di directornan y companianan miembronan di AHATA ta brinda nan apoyo y sosten na e introduccion, promocion y implementacion di e ley.

Ta conoci den comunidad cu pa varios decada caba, for di prome cu AHATA a institui su Comision di Medio Ambiente, e asociacion di turismo y hospitalidad ta enfoca semper riba solucionnan y oportunidadnan pa mantencion y mehoracion di Aruba su flora, fauna y medio ambiente en general.

E ley aki ta uno importante pa comunidad di Aruba den su totalidad, incluyendo habitantenan di Aruba, como tambe e 1.8 miyon turistanan cu ta bishita e isla pa un of mas dia. AHATA y su miembronan lo ta contribuyendo na e implementacion y promocion di e ley.

Parlamentario Donny Rasmijn, Juliet Carvalhal, coordinador special pa e “green agenda” di Gobierno di Aruba y Omar Harms, consehero pa minister di asuntonan general, a duna un presentacion na directornan di AHATA, splicando e ley y e proceso di comunicacion cu comunidad y bishitantenan, te na implementacion di e ley, cual ta drenta na vigor dia 1 di januari 2017.

AHATA ta un partner importante y e comision di medio ambiente tin basta aña ta purba haya un ley asina; nan kier mira cambionan tuma luga riba tereno di medio ambiente, Donny Rasmijn a comenta.

El a agrega cu loke ta importante pa nan ta pa AHATA brasa e ley y contribui na e educacion di e comunidad y e turista y yuda promove e ley. E parlamentario entre otro a menciona e inclusion di un grabacion promoviendo e ley pa medio di e sistema di circuito cera cu ta wordo uza pa mayoria hotel pa brinda bonbini y duna informacion di nos isla pa medio di e televisionnan den nan cambernan.

Tambe e team encarga a sugeri pa hotelnan cu ta ofrece cambernan di e tipo “timeshare” of “condominium”, provee saco re uzabel pa nan huespednan den camber y/of regala e turistanan un saco re uzabel cu nan por uza durante di nan estadia, cu nan ta keda cune.

Juliet Carvalhal a splica cu e proceso pa yega na e ley tabata largo y el a wordo aproba riba dia 28 di juni ultimo di forma unanime pa Parlamento di Aruba. Awo e trabao ta cuminsa pa educa y comunica cu negoshinan y e comunidad; y e team ta hopi contento cu e reaccion positivo cu nan ta hayando for di comunidad, el a bisa. Loke e ley ta prohibi ta pa puntonan di benta distribui, sea gratis of pa un suma chikito, saconan di plastic cu ta destina pa wordo uza un biaha. Ora un ley pasa ta duna comunidad tres luna pa prepara pa e implementacion y den e caso aki ta dunando seis luna di tempo di gracia, Carvalhal a conclui bisando.

Na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tour y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.