Aruba Hotel & Tourism Association (AHATA) ta nota cu tin percepcion incorecto den comunidad en cuanto empleo den sector hotelero. E informacion incorecto ta causa conclusion negativo cual por descurasha ciudadanonan cualifica pa traha den sector di hospitalidad. Consecuentemente, servicio ta sufri y eventualmente e reputacion di nos isla tambe.
E falta di interes pa e trabou di localnan cu ta candidato ideal, pa motibo di nan hospitalidad y conocemento di diferente idioma, ta causa e necesidad pa yena e cuponan cu migrantenan cu ta rekeri permiso pa traha.
AHATA ta enfatisa e importancia di un discusion riba empleo den sector hotelero basa riba data real en bes di anecdota of redo. Hotel y Timeshare miembro di AHATA ta comparti informacion cu e asociacion pa asina garantisa publicacion di data corecto y na un forma consolida.
E recopilacion di data mas recien di AHATA ta un estudio di Manpower (Empleo) bou di su miembronan hotelero y timeshare. E 22 hotelnan den e estudio ta representa 7,155 camber y 7,562 empleado. Door di publica e resultadonan di e estudio aki, AHATA ta comparti y duna un miho bista riba cierto data relaciona cu empleo. Entre otro e estudio ta mustra cu di un total di 7,562 empleado trahando 84% ta ciudadano residencia cu no ta rekeri permiso di trabou, 3% ta gana salario minimo (cual mayoria adicionalmente ta gana tips cu no ta wordo raporta of paga belasting).
AHATA ta gradici su miembronan pa comparti e informacion confidencial pa asina aki comunidad por haya informacion corecto.
