Ta un muhe di color den un mundo obsesiona cu hende blanco ta un guera riba su mes. Pero e micro agresionnan cu mi ta experencia tin biaha na un pais predominante blanco, ta algo fuera di e mundo ki. Kere mi, mi no ta exagera.
Y e storia aki no ta basa riba ami so, pero mas bien riba experiencianan cu mi ta scucha
di otro muhenan di Caribe cu ta comparti cu mi kico nan ta pasa aden. Tin par tin’e pio cu otro, paso ainda Rotterdam, Amsterdam y Den Haag ta basta diverso. Pero tin otro ciudadnan unda casi no tin diversidad y nos ta sinti nos mes 10 biaha mas straño ainda. Nos tur sa cu tin un cierto percepcion eyfo di muhenan Caribense, mescos cu nos sa cu tin un historia di sclavitud hopi cruel ta core den nos sanger. Y mescos tin Hulandesnan cu no kier tin nada di haber cu nos cu ta bin di e parti mas cayente di mundo. Tin esunnan cu tin un obsesion cu hende di color, cu ta crusa poco limite. Tin un sin fin di apropiacion cultural ta tuma luga tambe (pero nos ta warda esey pa un otro dia).
No ta solamente Hulandes, tin Turco cu Marocano y demas nacionalidadnan cu simplemente no por contene con nan wordo excita ora nan wak un muhe di color. “Lekker krullen van je! Je ben gewoon exotisch!” Desde Brazil te na Corsou, nan no ta stop di cuestiona di cual pais na mundo mi ta bin. Y ora bo bisa Aruba, e tono ta cambia. “Dus praat je ook dushi?” Kico esey kiermen necesariamente ami no sa, pero locual ta haci e diferencia ta cu nos tin un historia colonial tras di nos lomba. E creencia ey cu nos ta basicamente di nan.
Ki ora “exotico” of “lekker tropisch” ta bay di un compliment pa un insulto? E ta dificil pa bisa, paso tur cos ta depende di e combersacion entre dos persona y con e mensahe ta wordo ricibi. Pero e termino exotico ta keda algo controversial.
“Ja meisje mag ik je iets vragen?” un señora a puntra mi den supermarket, mi ta sacudi mi cabes den forma di un si y e ta sigui “Zijn die haren echt van jou? Is het niet een permanent?”.
E ta facil pa mira e combersacion manera algo sin maldad. Pero e berdad ta cu ningun hende ta cana bay cerca muhenan blanco y puntra nan si nan cabey ta di berdad. Sinembargo, pa un of otro motibo hende ta pensa e ta okay pa puntra cosnan asina ki na muhenan di color. Na scol tur hende ta cana mishi cu mi cabey sin puntra manera ta un cos mi ta un atraccion di circo. “Ja meisje het is zacht als de vacht van een schaap”. Si, e ta zona pret. Pero na final di dia e no ta kita e echo cu hende ta sinti nan mes cu suficientemente permiso pa invadi espacio personal.
Pasobra mi cabey no ta algo cu ta separa di mi curpa, e ta un parti di mi. Y esaki ta pakico feminismo intersectional ta necesario, pasobra bo por papia di opresion en general ora e ta yega na hende muhe. Pero muhenan di color ta biba un otro realidad cu muhenan blanco, mirando cu muhenan blanco, den wowo di mundo ta e standard di beyesa y tur cos cu ta leu di esey ta manera nan ta bisa “exotico”.
