Departamento di Asuntonan Economico, Comercio y Industria y su unidad Exprodesk den colaboracion cu Ministerio di Asunto Economico, Comunicacion y Desaroyo Sostenibel, ProDominicana, Junta Agroempresarial Dominicana (JAD) y Consulado General di Republica Dominicana na Aruba ta invita tur negociante y importadornan pa un anochi informativo tocante e feria Agroalimentaria 2025 dia 13 di Maart 2025 na Departamento di Asuntonan Economico (Sun Plaza Building, 2nd floor) pa 6:30 PM.
Mester registra via e link: https://cutt.ly/Agro2025
E mision ta centralisa riba e feria internacional Agroalimentaria 2025, cu lo tuma lugar di 28 te 31 di mei 2025. Agroalimentaria 2025 ta e plataforma mas grandi di Republica Dominicana pa sector agroalimentario, bebida y tabaco, cu lo reuni mas di 250 exportadornan Dominicano. Durante e feria, lo tin presentacion di productonan como berdura, fruta, condimentonan, pasta, koffie, cacao, tabaco, cerbes, rum Dominicano y hopi mas.
Pakico e feria ta importante pa Aruba?
E situacion economico mundial ta cambia constantemente, cu aumento di tarifanan riba importacion na Merca y otro paisnan clave. Aruba mester sigui diversifica su lazonan economico y explora opcionnan nobo pa importacion y inversion. Agroalimentaria 2025 ta un oportunidad ideal pa empresarionan Arubiano traha conexion cu negoshinan Dominicano, amplia nan red comercial y explora colaboracionnan nobo.
E feria lo brinda oportunidadnan pa comerciantenan por explora posibilidadnan nobo di colaboracion y importacion a traves di reunionnan y ronda di negoshi cu exportadornan Dominicano, conferencianan y presentacionnan riba e sector agroalimentario.
Agroalimentaria 2025 ta ofrece e siguiente beneficionan gratis:
Tres anochi di hotel;
Transportacion Aereopuerto-Hotel y Hotel-Aereopuerto;
Reunionan cu exportadonan local (B2B meetings);
Sosten y asistencia prome y durante e feria di Agroalimentaria 2025.
Anochi informativo ta tuma luga: 13 di Maart 2025
Durante e anochi informativo, lo brinda mas informacion riba e feria, e mision comercial y con bo por participa. Participacion na e anochi informativo ta completamente gratis y sin compromiso. Pa mas informacion y con pa participa por tuma contacto cu Sra. Sharon Meijer na: s.meijer@deaci.aw
