Durante un sesion informativo di Gobierno di Aruba denomina “Aruba Fuerte y Resiliente” a wordo treci dilanti un bista riba trabounan di Departamento di Asuntonan Economico pa asina por reactiva economia di Aruba na momentonan aki door di crisis di Covid-19.
Pa cu esaki, Louella Croes-Ras funcionario riba maneho di Iniciativa pa Desaroyo di Empresa Arubano (Idea) a informa tocante diferente webinar cu nan a haci e aña aki pa sector di agricultura, e cual el a menciona cu ta un di e sector prometedor di economia na Aruba.
E webinar aki a inclui informacion di plantacion basico, tambe informacion di impuesto liber y importacion pa productonan y materialnan, con por importa pa por practica agricultura, tambe el a sigura cu tambe a wordo papia riba dispensacion di impuesto cu ta toca pa agricultornan, parti di tereno cu tin disponibel na Aruba pa practica agricultura, asina como tambe informa riba loke ta trata un business plan pa esunnan cu kier habri un negoshi di agricultura.
Tambe, el a menciona plantacion organico cu segun e ta hopi importante pa por enfoca den futuro riba dje , desde luna di mei nan a organisa tur e webinar aki dirigi pa agricultor y esunnan cu ta haciendo un negoshi caba di esaki.
Di loke ta trata sector di economia circular, Croes-Ras a comenta cu nan a bin cu e idea aki pa motibo cu nan a tende cu desde november 2019 cu a bin e prohibicion di plastico di un solo uso nan kier a presenta esaki pa informa e comunidad di Aruba tocante e ley aki cu a drenta na vigor na luna di juli ultimo, pa finalisa, el a expresa cu nan a combina esaki cu economia circular pa wak con Aruba por adapta na esey y na e negoshinan cu ta existi, cu algun di nan ya caba a cuminsa implementa esaki.
