Awe mainta tempran un grupo di trahadonan di e seccion di emergencia di Horacio Oduber Hospital (HOH) a protesta.
Presidente di sindicato ABV, Gina Maduro, a bisa cu nan a dicidi di bin cu e accion aki di dos ora, ya cu e agresion fisico y verbal pa e trahadonan aki a sigui aumenta. El a aclaria cu e ta un accion responsabel, ya cu apesar cu nan ta protesta, tin personal paden pa atende cu casonan di emergencia.
E ta un situacion cu ta birando peligroso y te hasta nan tin temor cu nan bida por core peliger. Sindicalista Maduro a bisa cu antes ora bo tabata un enfermera tabatin mas respet. “E ta un vocacion”, el a bisa, pero ultimo añanan e respet a bay casi completo. E pashent a bira mas exigente y tambe mas violento door di e sistema mes. El a agrega cu nan mes como trahado ta victima di e sistema hunto cu e pashent mes.
Pa 11’or di mainta sindicato lo tin un reunion cu e director encarga di HOH, Dr. Caceres, pa atende cu e situacion cu e trahadonan di enfermeria basta preocupa.
