Ta casi cuatro luna despues di e invasion hudicial den marduga na cas di un mandatario di actual gobierno. Algo sin igual den historia di Reino Hulandes. Tambe e magnitud di e operacion tabata algo unico, igualmente e participacion di varios cuerpo policial y hudicial di Hulanda. Contrario di loke nos a anticipa, no tabatin ningun protesta contra e intervencion directo di forsanan hudicial Hulandes na Aruba. No di e gabinete, no di e partido na mando, ni di oposicion.
Desde e prome momento tabatin un ambiente den cual tur hende tabata di opinion, o en todo caso no a expresa uno contrario, cu esaki tabata hustifica. Aparentemente nos a bay di acuerdo cu, di awor en adelante, intervencion hudicial directo for di madre patria ta posibel, y hasta hustifica. No comprende nos malo, nos posicion ta cu ora corupcion, o en todo caso e sospechonan di corupcion, na e nivel mas halto den gobernacion ta yega na e extremo aki, e papel supervisor y di apoyo di Hulanda/Reino ta algo logico y hustificabel. Al fin y al cabo, ora cos ta malo, y esaki tabata mustra super malo, ta nan mester provee na ultimo instancia e apoyo cu nos mester.
Despues di tur e agitacion di e prome dianan, a cuminsa e espera largo, di con e proceso di investigacion lo bay desaroya. Y mientras tanto a surgi tambe e debate tocante kico e ministro mester haci, como miho opcion den e situacion ey. Ya cu nos tabatin un caso cu tabata involucra husticia mas aya di nos frontera, lo tabata logico tambe pa mantene e standardnan Hulandes pa mandatario cu keda confronta cu acusacion di e indole aki. Y esey ta implica renuncia e cargo y duna e gabinete un oportunidad pa continua trabao, mientras cu e autoridadnan hudicial ta haciendo nan trabao.
Esey no a resulta asina, pasobra a bay haci tur tipo di maniobra straño pa evita cu e ministro en cuestion lo a tuma su retiro, mientras cu despues a resulta cu e mes tabata pensa na prome momento caba pa haci lo unico corecto, y esey ta retira como ministro. Y, pa nos no haya henter e discusion ey atrobe: retira no ta implica cu bo ta reconoce culpabilidad. E ta nada mas cu reconoce cu bo ta responsabel pa laga e asunto yega asina leu, y bo ta hala un banda pa gobierno por sigui, y husticia por sigui, sin estorbo. Esey no a sucede y nos a keda cu e situacion di un ministro sinta na cas, sin cartera pero cu pago; otro ta bisa cu e ministro ta suspendi, loke no ta e caso, etc. Contal cu e situacion ta duna oportunidad na un y tur pa defini e situacion di e ministro manera nan ta haya ta bon. Nos tin e leve sospecho cu esaki tabata exactamente e proposito di e maniobra straño di nos prome ministro: crea confusion, pa despues por bira e asunto na e manera cu mas ta conveni na cierto momento.
Loke talbes ningun hende a spera tabata cu e investigacion lo a tuma asina hopi tempo. Straño pasobra cualkier persona bon informa tabata sa cu e monton impresionante di documento, riba papel y digital, a haci di inicio caba bastante improbabel cu lo tin un presentacion di e caso dilanti mesa berde prome cu eleccion. Esaki awor ta obliga e partido den gobierno pa tuma cierto decision cu nan lo a prefera cu e curso di e asuntonan mes lo a indica. Si lo tabatin un citacion (dagvaarding) den corte prome cu eleccion, esey di tur manera lo a duna claridad den e asunto. Awor ta tempo pa tuma otro rumbo, y esey ta parce di ta e no aparicion riba lista dia 4 di augustus. E rumornan acompañante di e reemplaso pa un ruman ta zona ridiculo, no pa e persona mes pasobra si e kier asumi un cargo politico, esey ta su pleno libertad. Pero pasobra e partido ta aparenta incapaz pa percura pa otro candidato fuerte cu no ta famia. Asina por evita tambe e seyo di nepotismo cu henter e asunto ta poniendo riba e partido. Pasobra ban ta serio: unda e familiar di e ministro di enseñansa a keda pa asumi responsabilidad pa su votonan, ora el a anuncia cu e no ta sigui como minister? Ningun hende a haya esey necesario, of si? Ta di unda a sali cu mester tin un familiar para cla pa asumi e cargo aki? Kier confirma cu esaki cu poder politico na Aruba ta dividi entre cierto famianan cu ta pasa nan voto di un pa otro, como si fuera e personanan di carni y weso ey, cu ta bay vota, no tin ningun boluntad di nan mes?
Ta parce cu den e asunto aki a laga interes di partido prevalece. Ta e partido kier a tene e asunto asina tur e tempo aki, pa finalmente yega dia di entrega lista y sacrifica e candidato finalmente, si no tin scapatorio. Si e persona en cuestion mes a entrega su retiro desde inicio, tur e wega actual di agonia politico den etapa, no tabata necesario.
