Recientemente, Secretario di Estado pa Asuntonan di Reino, Zsolt Szabo a publica e Agenda y Rapport di Ehecucion di e reformanan acorda cu Hulanda den Landspakket. Den e capitulo riba Maneho Financiero, ta analisa e logronan te awo, y e retonan cu ta persisti.

Den añanan recien, Aruba a inicia un biahe transformador pa reforsa eficiencia y responsabilidad di su sistema di maneho financiero. E proceso aki, hancra den transparencia y reforma structura, ta alinea cu su metanan nacional y internacional. Door di implementa practicanan moderno y adapta na standardnan global, Aruba tin meta pa optimisa su administracion financiero, haciendo esaki un pilar di bon gobernacion y confiansa publico.

Metanan di reforma di maneho financiero

E obhetivo general ta sigura cu gobierno di Aruba ta opera “den control” di su finanzas publico. Esaki ta encera e maneho puntual y efectivo di e ciclo presupuestario y un marco financiero comprensivo cu ta cumpli cu ley. Na mesun momento, e sistema aki ta priminti di ofrece rapportnan cla y precies na Parlamento, fomentando responsabilidad y confiansa publico.

E iniciativanan di reforma financiero na Aruba ta mara na varios Meta di Desaroyo sostenible (SDG), incluyendo trabao decente y crecemento economico (SDG 8), ciudad y comunidadnan sostenible (SDG 11) y accion di clima (SDG 13). E esfuersonan aki ta subraya e importancia di prudencia financiero como un base di desaroyo sostenible y inclusivo.

Logro y progreso

Un cantidad di meta critico ya a ser logra como parti di e agenda di reforma financiero. Entre esaki tin e introduccion di standardnan nobo di reportahe y e implementacion di mehoracion den preparacion di presupuesto, manera e adopcion di e Memorandum di Presupuesto di Spring. Adicionalmente, actualisacion na regulacion di contratacion publico y un evaluacion comprensivo di e dependencia di data financiero di Departamento di Aduana tambe a keda completa.

Gobierno tambe a desaroya un blueprint pa optimisacion di proceso financiero. Esaki ta inclui e adopcion id e modelo ‘Tres Linea’, cu ta delina e rol y responsabilidadnan a traves di e capanan operacional, gerencial y di auditoria, asina mehorando medidanan di riesgo y control di calidad.

Atendiendo reto

Mientras cu progreso ta notable, ainda tin reto. E introduccion di reglanan nobo pa contratacion publico y regulacionnan di maneho financiero a enfrenta retraso pa motibo di bottleneck legislativo y administrativo. Similarmente, esfuersonan pa centralisa y automatisa procesonan financiero a traves di templates mehora, training y sistemanan ta rekeri mas inversion y experticio externo.

Pa atende e retonan aki, Aruba ta usando sosten tecnico y experticio. Uso di specialistanan SAP, por ehemplo, tabata clave den mehora e traceability y integridad di documentacion financiero dentro di departamentonan clave di gobierno.

Bista futuro
 Mirando dilanti, e agenda di reforma financiero di Aruba ta enfoca riba varios iniciativa strategico. Esakinan ta inclui e implementacion den fase di un marco revisa di reportahe financiero, cu meta pa 2026, y e despliegue di un aplicacion integra pa presupuesto pa simplifica e presupuesto den procesonan di preparacion y monitoreo.

Adicionalmente, tin un enfasis fuerte riba training di manager den prome linea riba riesgo y control di calidad pa sigura cu nan ta ekipa pa supervisa procesonan financiero primario.

Otro area critico ta e mehoracion di maneho di subsidio. Cu plan pa evalua relacionnan existente di subsidio y desaroya un marco nobo pa subsidio pa 2026, gobierno ta busca pa reforsa eficiencia y responsabilidad den e sector aki.

Impacto amplio
 E reformanan den maneho financiero no ta solamente tecnico, tambe nan ta representa un compromiso mas amplio pa cu bon gobernacion y excelencia den servicio publico. Door di establece un marco financiero robusto, Aruba ta poniendo e base pa toma di decision mas transparente y uso efectivo di fondo publico. Esaki, alabes, ta bay permiti e pais atende miho cu e necesidadnan di su ciudadanonan y logra su metanan di desaroyo a largo plaso.

Como conclusion, e rapport ta bisa cu e caminda pa reforma financiero ta un ehempel di Aruba su dedicacion pa crea un administracion publico mas eficiente, transaparente y responsable. Mientras cu ainda tin reto, e logronan te awo ta demostra e determinacion y capacidad di gobierno pa innovacion. Mientras e reformanan aki ta desenvolve, nan ta priminti di reforsa e fundeshi fiscal di Aruba, sigurando cu ta maneha recursonan publico efectiva- y igualmente pa beneficio di tur.