Millennium Development Goals (MDG), tabata e agenda cu a mobilisa comunidad internacional di aña 2000 pa aña 2015. Durante e ultimo añanan, Nacionnan Uni (UN) ta discutiendo kico mester haci pa reemplasa e agenda aki. Pa e motibo aki, den e proceso cu a cana pa adoptacion di e agenda aki, Nacionnan Uni a tene e consulta di mas grandi cu ciudadanonan rond mundo unda cu mas di 10 miyon persona a expresa nan aspiracion con e agenda mester ta. Awor cu e agenda a wordo adopta door di 193 estado miembro di Nacionnan Uni, e prome mensahe mester ta riba loke ta diferente for di e anterior agenda.
Sr. Pedro Conceicao, director di Politica di Strategia di “Bureau for Policy and Programme Support” di UnitedNations Development Programme (UNDP), durante su bishita na Aruba a bisa: “E agenda aki ta basta diferente”. E ta un agenda pa transforma nos mundo den direccion di sostenibilidad y mehoracion di e standardnan di bida di e ciudadanonan di tal forma cu e ta consistente cu proteccion di nos planeta.
Tambe e agenda ta encera diferente forma di participacion di ciudadanonan, participacion di sector priva y un forma diferente di tuma decision y implementacion di decisionnan na nivel gubernamental.
Nacionnan Uni awor ta cla pa apoya Aruba y otro paisnan den implementacion di e agenda aki, specialmente mirando cu e agenda no ta uno di Nacionnan Uni, pero ta un agenda di estadonan miembro cu a compromete nan mes pa implementa esaki, unda cu e rol di Nacionnan Uni ta pa brinda apoyo den e proceso di implementacion.
