Agenda di ehecucion riba belasting ta rekeri intercambio di dato bancario di personanan y negoshinan

Gobierno mester tin su decisionnan cla pa 15 di November pa cumpli cu reforma di belasting

Pa 1 di September, mester tin calculacionnan, concepto di ley y estudio di factibilidad cla pa introduci un VAT of hasta un ABB na Aruba. Y Gobierno di Aruba mester tin e decisionnan cla pa 15 di November 2021.

Esaki ta locual Gobierno di Aruba y Hulanda a firma pa e agenda di ehecucion di e kwartaal cu ta cuminza core e siman aki. E agenda di ehecucion ta producto di e landspakket cu ta palabra entre Hulanda y Aruba como condicion pa e sosten di likides.

Obhetivo reforma di belasting

Pa loke ta e tema di belasting, meta di e reforma ta pa crea un structura di belasting fuerte cu base amplio cu ta contribui na un reparticion mas honesto di entrada. Ademas, e structura nobo mester stimula economia, y eleva implementacion ademas di e posibilidad di control pa medio di Servicio di Impuesto di Aruba, SIAD. Ademas, obhetivo ta tambe pa realisa un servicio di impuesto cu ta adecuadamente ekipa.

Como tal, lo tin un revision integral di e structura fiscal, incluso e belasting riba entrada (inkomstenbelasting), y aki ta unda Aruba mester hala di belasting directo pa uno indirecto y introduci sea un VAT di 12.5 porciento conforme e proposicionnan di e Departamento di Asunto Fiscal di IMF of e ABB, conforme e structural fiscal di Caribe Hulandes (Islanan BES).

Mester bin medida dirigi pa reduccion substancial di gasto cu por kita di belasting y contribucion y transferencia pa otro cu por kita di belasting. Tambe kier limita autoridad discretionario y/of metemente di tanto Gobernante como empleadonan publico riba e areanan di tax holiday of hasta kico por kita di belasting.

E revision lo produci consehonan cu ta bira proposicionnan concreto cu mester keda implementa, teniendo na cuenta reglanan di entre otro e Organisacion di Cooperacion y Desaroyo Economico, OECD.

E prome paso ta un plan pa yega na e revision aki, y e calculacionnan, concepto di ley y estudio di factibilidad mester ta cla pa 1 di September 2021, pa asina por introduci e sistema di belasting indirecto pa 1 di Januari 2023. Pero pa logra e fecha aki, mester tin e decision di Gobierno pa mas tarda, dia 15 di November 2021.

Intercambio dato bancario mester bira e regla

SIAD tambe lo cuminza colecta dato bancario di clientenan, si esaki no ta sosode caba y lo traha riba un plan pa conecta banconan, notarionan, SVB y fondonan di pensioen na otro. Pa esaki mester bin conceptonan di ley pa ahusta e Ley Belasting pa percura cu ta permiti intercambio di datonan personal na nivel nacional. Esaki mester ta cla pa prome di Augustus 2021. E evaluacion di e plan di accion y tambe re-evaluacion pidi na OECD pa intercambio di dato personal na nivel internacional mester ta cla pa 1 di April 2022.

Dia 15 di Augustus lo mester tin plannan cla con ta sigui cu e trabaonan pa yega na e metanan den e landspakket pa loke ta belasting, cu ta encera optimalisacion y modernisacion di SIAD.

Tapa buraconan den areglo di belasting

Ademas ta bin un areglo di belasting entre Hulanda y Aruba, den liña di e condicionnan minimo di Base Erosion and Profit Shifting, BEPS. BEPS ta referi na strategianan di planificacion di belasting cu empresanan multinacional ta usa, pa asina probecha di cualkier buraco pa evita di paga belasting. Paisnan den desaroyo, segun OECD, cu ta depende di belasting cu companianan internacional ta genera (na Aruba, cadenanan hotelero) ta sufri desproporcionalmente di BEPS, cu ta costa paisnan rond mundo entre 100 pa 240 biyon dollar na entrada di belasting anualmente. Como 135 pais y hurisdiccion ta colaborando riba implementacion di 15 medida cu mester elimina e buraconan aki y asina mehora e coherencia di areglonan internacional di belasting y asina sigura transparencia riba tereno di belasting. E intencion di e colaboracion entre Hulanda y Aruba ta pa evita cu ta bin posibel cambio di ganashi y pago di impuesto riba ganashi. Conseho di Minister di Reino lo trata e areglo aki na September e aña aki.

VAT of ABB

E agenda di ehecucion ta duna Aruba e escogencia pa bay pa un sistema di belasting indirecto basa riba un VAT of un ABB.

Na 2020, ex Minister di Finanzas di Aruba, mr. Angel Bermudez a splica cu den su concepto un ABB lo ta miho pa Aruba. Por corda con e ex Minister a cuminza e gestionnan pa explora introduccion di VAT na Aruba a base di e conseho di IMF, pero tabata e tempo ey Prome Minister Mike Eman kende a para cualkier proceso di VAT.

Kico ta VAT

VAT ta un omzetbelasting. E empresario ta paga e VAT na Belasting y ta cobra esaki bek na clientenan. Ora e cadena di benta ta largo, e ta nifica un administracion mas complica, pasobra e gastonan cu e empresario haci pa compra di servicio y producto cu tin VAT of BTW riba dje, por kita despues for di belasting. “E ta un impuesto cu ta usa na Europa cu tin kolomnan largo y na Aruba tin kizas tres cadena. Pero cu ta trece hopi administracion basta intenso. Ta procesonan administrativo cu ta pone cu un sistema BTW of VAT ta mas sensitivo pa fraude. Hulanda a experiencia esaki,” Bermudez a splica na Bon Dia Aruba, na 2020.

Kico ta ABB

ABB di otro banda, ta mas simpel y ta un solo cobranza, cu a keda crea pa Hulanda pa islanan BES. Ta un cobranza tin na momento cu e producto ta drenta frontera. E ta un belasting cu mester reemplaza tarifa di importacion, y ta inclui e BAVP, BAZV y e BBO, cu nifica cu e ta un bay ta un belasting di dos cifra. “Ta un biaha ta cobra y e ora ta cla,” Angel Bermudez, kende ta un fiscalista a splica.

E sistema cu conoce na BES, cu ta cobr’e na frontera y riba productonan cu ta importa. E producto ta drenta den mercado, y no ta haya ningun agregacion di belasting mas. Locual por bin acerca ta e ABB riba e servicio, y tambe riba productonan cu ta produci na e pais mes. Por ehempel, cerbez cu ta produci na Aruba. Asina cu sak’e for di fabrica, ta cobra e ABB. Pero Bermudez ta splica cu e unico complehidad ta ora cu berdad mester inclui e ABB pa e gasto di servicio. Por ehempel si un bar ta bende un cerbez cu ta importa, si sigui e producto, na un bar por ehempel mester agrega e ABB riba e servicio cu e bartender ta duna, y e dosnan aki ta keda refleha den e prijs final. Pero eseynan ta cosnan cu for di inicio ta scoge, pa no haya e discusion den mercado. E ta un heffing relativamente simpel. “E ta simpel den ehecucion y simpel pa siguie den mercado.”

Otro ehempel por ta si ta hiba un auto pa un garashi pa servicio. E productonan cu ta usa, ya ta inclui e ABB. E mecanico tin su prijs pa ora. Y tin un ABB riba e prijs pa ora aki. E cliente ta paga e prijs di e producto mas e prijs pa ora di e trabao cu ta inclui otro ABB. “Riba su mes e no ta administracion complica, pasobra cada compania tin e administracion separa pa e productonan. Si e tarifa di ora di e mecanico ta 50 florin, y trabao ta tuma dos ora, ta nifica cu lo mester paga un ABB riba e 100 florin.”