No ta kita di e idea pa dolarisa nos economia

E proposicionnan den e agenda di ehecucion di e landspakket cu a caba di firma cu Hulanda ta keda similar, cu excepcion di kizas fechanan cu ta hala. Pero tambe tin detayenan nobo cu unabes cu nan keda aplica, lo tin consecuencia pa henter comunidad.

Tur, segun Hulanda tin como meta pa reforma entre otro economia y mercado laboral, ademas di e sector financiero pa yuda Aruba bira mas resiliente.

Belasting

E ta cuminsa cu reforma di belasting. Meta ta e reorganisacion di un sistema di belasting robusto cu un base amplio cu ta contribui na un reparticion mas husto di entrada, stimulacion di economia y implementacion y permiti miho control di servicio di impuesto, SIAD. Tambe pa realisa servicio di belasting cu ta adecuadamente ekipa.

E structura fiscal nobo mester drenta na vigor dia prome di Januari 2023. Pero pa logra esey sistema di belasting di Aruba mester bira mas robusto pero tambe mas simple y pa esey mester tuma luga un revision integral riba e sistema fiscal incluso inkomstenbelasting. Aki lo tene proposicionnan manera ampliacion di e base di belasting, hala di sistema directo pa indirecto y introduccion di un BTW/ VAT (Value Added Tax) di 12.5 porciento, conforme e sugerencia di e Fiscal Affairs Departament di IMF of e sistema ABB conforme e sistema fiscal di Caribe Hulandes.

Obhetivonan ta bin cu medida dirigi na reduccion substancial di gasto di belasting y contribucion na tercero, y limita envolvimento administrativo/autoridad discrecionario di tanto ambtenaarnan como gobernante, por ehempel pa duna entre otro asina yama ‘tax holidays.’ Segun e landspakket acorda, lo tene cuenta cu reglanan internacional, entre otro di e Organisacion pa Cooperacion Economico y Desaroyo, OECD.

Departamento di Belasting lo ricibi datonan di sector bancario, te asina leu cu e no ta sosode ainda. Mester bin un plan con pa conecta banconan, notario, SVB y fondonan di pensioen y pa 1 di April 2022, Aruba mester a pidi un evaluacion di e plan di accion y reevaluacion na OECD pa asina por permiti intercambio di datonan na nivel internacional.

Segun e landspakket, esaki ta tarea di Aruba, cu tambe mester percura cu tin e implementacion di e cambio di e ley di belasting riba intercambio automatico di dato pa 1 di Januari 2023. Den combersacion entre Aruba y e TWO (Tijdelijke Werkorganisatie) cu ta cana dilanti COHO, a dicidi pa laga e cambionan cana hunto cu henter e revision di e ley.

Mientrastanto, investigacion lo mester determina con por optimalisa y modernisa e funcionamento di servicio di belasting, di forma pa cobramento por sosode na forma eficiente y efectivo. E plan di accion pa e desaroyo aki lo mester ta pa 1 di Februari 2022.

SIAD lo mester raporta regularmente riba e progreso di e procesonan, unda tambe ta pone atencion na adaptacion di e sistemanan automatico, e desaroyo di e organisacion di SIAD, e comunicacion cu comunidad riba e desaroyonan aki y preparacion na direccion di companianan y organisacionnan.

Tambe lo yega na un acuerdo di belasting entre Hulanda y Aruba, den liña di e asina yama condicion Bae Erosion and Profit Shifting, unda ta busca forma pa evita cu ta move ganashinan, cu ta afecta pago di belasting. A trata e tema aki durante e ultimo reunion di Conseho di Minister di Reino, pero su introduccion lo ta pendiente tratamento di entre otro Parlamento di Aruba.

Sector Financiero

E meta di reforma di sector financiero ta pa yega na uno stabiel cu por sostene un economia real, ademas cu por realisa un regulacion adecuado di e sector, unda ta supervisa implementacion di e reglanan. Di e forma aki e supervisor por actua na ora y determina si tin problema na y cu empresanan financiero.

Hulanda ta keda mantene cu mester haci investigacion na e costo social di florin compara cu introduccion di dollar. Un instancia independiente lo haci e analisis. Pero, e tema aki lo mester keda concretisa na 2022. Locual si mester sosode ta modernisacion di regla y leynan, manera e introduccion di e structura di garantia di deposito, DGS. E landsbesluit mester keda presenta na Parlamento pa 1 di Februari 2022, pendiente e trayecto di conseho di entre otro Raad van Advies.

E proposicion pa e Ley Credito Consumidor mester bin na vigor, pero ta pendiente e decision di Parlamento cu segun e landspakket mester a ricibi e pakete di ley e luna aki.

Reforma economico

Aruba mester yega na un economia resiliente, dinamico, cu ta stimula pa un structural di siguridad social cu ta robusto pero pagabel, segun e palabracionnan den e landspakket. E maneho di mercado laboral como tal mester keda analisa, ley y reglanan mester keda implementa pa actualisa y modernisa e maneho aki. Medidanan manera corta den ora di trabao, trabao parttime, contractonan di duracion specifico, suavisa e ley di retiro, kita e estorbonan pa tuma trahadonan di afo, elimina e reto pa hobennan haya trabao mientras cu alabes mester para e practica pa pone muchanan traha ta inclui den e analisis cu mester produci proposicionnan y maneho. E rapport final mester ta cla pa 1 di Maart 2022, y ta den man di Hulanda y Aruba.

Segun e landspakket mester actua contra economia informal y di mesun forma, actua contra trahamento di forma ilegal. Pues lo mester determina ainda con grandi e economia informal ta y kico mester haci, pero bao tur circunstancia mester evita cu ta laga personanan stranhero sin permiso participa na actividadnan laboral. Pa determina esaki tin investigacionnan tumando luga y un plan di accion multianual mester ta cla pa 31 di Maart 2022. A dicidi pa hala e fecha aki mas atras cu tabata e intencion originalmente pa motibo di e complehidad di e tema y di e diferente actornan. E trabao aki ta den man di Aruba.

Di otro banda, Hulanda y Aruba a traha hunto den un grupo piloto riba e reforma di e mercado laboral y e investigacion na e structura di siguridad social y pa 1 di Maart 2022 mester presenta su rapport. E pensamento ta cu e structura di siguridad social lo haya un funcion di actividad, unda cu e stimulonan necesario lo percura tambe pa asina yama ‘vangnet’ social cu ta adecuado.

Pensioen y edad di 66

Segun e landspakket, Aruba lo hisa edad di pensioen cu un aña, esta 66, na 2025, a lo menos cu investigacion mustra cu e fecha no ta realistico y cu mester bin cu proposicionnan alternativo cu tin e mesun efecto presupuestario. Un instituto economico independiente cu COHO lo nombra den deliberacion cu Aruba, lo pone riba papel kico ta e efectonan structural pa e presupuesto di e fondonan, y si nan ta por keda sigura pago di pensioen y brinda siguridad social si hisa edad di pensioen na 66 (na 2025) of hasta si mester hisa e edad pa medio di conecta esaki na expectativa di bida. E instancia aki lo haci proposicionnan alternativo, cu Hulanda y Aruba lo mester analisa hunto y determina con ta duna nan contenido. No tin un fecha pa e proceso aki, sino a dicidi pa hala esaki pa e siguiente agenda di ehecucion.

E palabracion tambe ta cu mester promove empresaria y clima di inversion, unda entre otro ta optimalisa e proceso di duna permiso, baha gasto di haci negoshi y elimina burocracia. Mester bin ainda cu proposicionnan pa cambio di ley pa e area aki. Ya caba a revisa e ley y reglanan existente e luna aki. Aruba tabata encarga cu e proceso aki, incluso e digitalisacion di procesonan entre otro e maneho di tereno. E reportahe final riba e cobransa pa permisonan y e sistemanan relevante mester ta cla pa 15 di Maart. Y Gobierno mester tuma un decision pa Mei 1, 2022.

.