Pa ricibi e yudansa financiero for di Hulanda, Aruba mester cumpli cu algun condicion cu ta poni den e landspakket cu a keda acorda cu Hulanda dia 13 di november 2020. Dia 1 di februari 2021 e agenda di e trabaonan necesario pa por cumpli cu e condicionnan pa e promer kwartaal di 2021 a bira conoci.
E agenda ta contene informacion riba e temanan di maneho financiero, costo y efectividad di sector publico, impuesto, sector financiero, reforma economico, cuido, enseñansa y refuerso di estado di derecho. E agenda di ehecucion di e temanan cu ta trata finanzas y economia den e promer kwartaal ta lo siguiente, segun ta informa den un comunicado di gobierno.
Maneho financiero
Lo investiga con pa reforsa e control financier na nos Pais door di Colegionan Halto di Estado manera Controlaria General y Conseho di Estado, y tambe di Auditoria General. Esaki lo mester ta cla pa 1 di maart 2021. Lo scrutina e maneho di subsidio pa saca afo locual no ta bayendo bon. Esaki tin un deadline di 15 di april 2021. Lo bin cu sugerencia con pa haci e compra di servicio y producto door di Gobierno mas eficiente y eficaz. E rapport aki lo mester ta cla dia 15 di april 2021.
Impuesto
Riba e tereno fiscal lo bay traha un plan pa investiga cua sistema di impuesto indirecto lo surti Aruba, si ta un BTW of ABB. E plan aki lo mester ta cla 1 di maart 2021. DIMP lo mester haya informacion di e sector bancario y lo mester traha un plan con e banconan, notarionan, Svb y fondo di pensioen por logra haya informacion bancario tambe. E plan aki mester ta cla 16 di maart 2021.
Lo traha un plan tambe con pa haci DIMP su trabao mas optimal pa asina por facilita e cobransa di impuesto. Lo cera un Acuerdo di Impuesto entre Hulanda, Corsou y Sint Maarten pa asina evita evasion di impuesto den Reino. Esaki lo mester ta cla pa 1 di maart 2021 pa asina keda trata 1 di juli 2021 den Conseho di Minister di Reino.
Sector financiero
Un ‘quick scan’ lo wordo haci di e sector financiero y e control riba e sector aki door di IMF su Article IV mission y a base di e resultado lo sigui un plan cu paso nan pa posibel mehoracion. E rapport lo mester ta cla na april of mei 2021. E investigacion pa dolarisacion no lo wordo haci awor, pero te despues di aña 2022. Lo traha tambe riba un agenda di e leynan cu mester wordo introduci of adapta. Lo cuminsa cu e deposito regeling y e leynan pa combati labamento di placa y financiamento di terorismo debi cu e aña aki Aruba ta wordo evalua pa CFATF. Un agenda detaya mester ta cla 1 di maart 2021. Pa e otro ley nan mester bin un agenda promer cu 1 di juli 2021.
Reforma economico
E enfoke di e reforma economico ta dirigi na reduci ‘red tape.’ Lo repasa e sistema di permiso pa negoshi y e leynan concerni y a base di e resultado lo traha un rapport di investigacion pa e pasonan necesario pa baha costo pa haci negoshi y burocracia. Esaki lo mester ta cla 15 di maart 2021. Bao di e reforma economico tambe lo trata otro topiconan cu ta afecta economia manera economia informal, analisis di e mercado laboral, trabao ilegal, sistema social pagabel y maneho di tereno.
Resultado di investigacion lo adapta e agenda
Pa awor aki hopi di e trabaonan pa por cumpli cu e condicionnan pa haya fiansa di Hulanda lo ta investigacion cu mester wordo haci pa asina haya un bista completo di e situacion na Aruba. A base di e resultado di e investigacion lo adapta e agenda y lo indica ki decision specifico lo mester wordo tuma pa haci e trabaonan necesario pa logra e reformanan desea.
