(AP) – Agencianan di Nacionnan Uni a adverti diaranson cu mas di 1 miyon Palestino na Gaza por experiencia en nivel mas halto di hambruna pa mita di proximo luna si e hostilidadnan sigui.
World Food Program y Agriculture Organization a bisa den un rapport hunto cu e hamber ta empeorando a causa di restriccion fuerte riba acceso humanitario y e collapse di e sistema di cuminda local den e guera di casi 8 luna caba entre Israe ly Hamas.
Nan ta bisa cu e situacion ta permanece precario na Gaza, cual a ser rondona pa trupanan di Israel pa lunanan caba. Israel recientemente a habri caminda den parti nort pero solamente por facilita trucknan den decena cada dia pa centenares di miles di persona.
Israel su entrada na Rafah a stroba e operacionnan di ayudo den e parti Sur. Egipto a nenga di habri su frontera Rafah cu Gaza mirando cu e forsanan Israelito a confisca e banda di Gaza casi un luna pasa, cual ta haci cu e ayudo mester pasa door di Israel su Kerem Shalom cu ta alrededor.
E ehercito di Israel ta bisa cu nan a permiti centenares di truck drenta via Kerem Shalom den simannan recien, sinembargo Nacionnan Uni hopi biaha no por yegan a e ayudo a causa di situacionnan di seguridad. E distribucion na Gaza tambe ta stroba pa e peleanan andando, e kiebre di ley y ordo ademas di otro restriccionnan Israelita.
Integrated Food Security Phase Classfication, e autoridad mundial den determina crisis di hamber a bisa den maart cu alrededor di 667,000 persona na Gaza tabata experenciando hamber di phase 5, e nivel mas halto cu ta ekivalente na muri di hamber.
E dos agencianan a bisa den nan rapport diaranson cu e cifra aki lo aumenta na mas di 1 miyon of casi mita di Gaza su poblacion total di 2.3 miyon, pa mita di proximo luna.
“Den e ausencia di un paro di e hostilidadnan y un acceso aumenta, e impacto riba mortalidad y e bida di Palestinonan awo, y di generacionnan den futuro, lo aumenta cu cada dia te hasta si evita hambruna den termino cercano,” el a bisa.
Riba diamars un grupo separa di expertonan a bisa cu ta posibel cu e hambruna ta na caminda na parti Nort di Gaza sinembargo e guera y restriccionnan na acceso humanitario a impedi e coleccion di data pa por comproba esaki. “E ta posibel, no probabel,” e grupo conoci como Famine Early Warning Systems Network (FEWS NET) a comenta tocante e situacion na Gaza.
Luna pasa, e hefe di World Food Program, Cindy McCain, a bisa cu parti Nort di Gaza ya caba a drenta un “crisis di hamber completo,” sinembargo expertonan na e agencia di Nacionnan Uni a bisa cu e ta expresando su opinion personal.
Un area ta considera di ta den hambruna completo ora cu 3 cos sosode: 20 porciento di e viviendanan tin un falta extremo di cuminda, of ta esencialmante muriendo di hamber; por lo menos 30 porciento di e muchanan ta sufri di mal nutricion agudo, nificando cu nan ta demasiado flaco pa nan haltura; 2 adulto of 4 mucha pa cada 10,000 persona ta muriendo diariamente a causa di hamber y su complicacionnan.
