(AP) – Hackernan trahando di parti di e gobierno Chino a drenta e red di computer di por lo menos 6 gobierno di estado na Merca durante e aña pasa, segun un reportahe publica riba diamars pa un agencia di siguridad cibernetico priva.
E reportahe di Mandiant no ta identifica e estadonan comprometi ni tampoco ta ofrece un motibo pa e invasion, cual a cuminsa mey di aña pasa. Sinembargo e grupo Chino aparentemente ta responsabel pa e atake cibernetico, APT41, ta conoci pa actonan di lansa operacionnan cu hacker pa ambos ganashi financiero y spionahe.
“Mientras cu e crisis na Ucrania a captura henter e mundo su atencion, cu tur su derecho, y e potencial pa atakenan cibernetico for di Rusia ta real, nos mester corda cu otro menasanan rond di mundo ta sigui cu nan operacionnan manera normal,” Geoff Ackerman, un analista di menasa na Mandiant Inc basa na Reston, Virginia.
El a agrega den su declaracion cu “nos no por sigui permiti otro actividad cibernetico sali for di nos bista, specialmente mirando nos observacion cu e campaña aki di APT41, un di e menasanan mas conoci, ta sigui te cu e dia di awe.”
Agencianan di estado ta keda victima pa hackernan, hasta despues cu e administracion Biden a anuncia pasonan adicional pa proteha e sistemanan di gobierno federal for di hacking. E ta un preocupacion specialmente urgente mirando cu e campaña di spionahe masivo di SolarWinds a cuminsa, den cual inteligencia Ruso ta explota e vulnerabilidad di e cadena di suministro.
