(NLTimes) – E compania di estado Ruso di gas yama Gazprom lo para e suministro di gas na e organisacion Hulandes GasTerra cu efecto inmediato, e agencia Hulandes a bisa riba diamars.
Gazprom a purba di ehecuta un decreto di President Ruso Vladimir Puin demandando cu e pago di e gas Ruso ser haci den rubles, cual GasTerra a nenga di haci.
E resultado ta cu Gazprom no lo cumpli cu su parti di e acuerdo pa entrega 2 biyon meter cubico di gas entre awo y 1 di october. Na e fecha aki, e acuerdo di e agencia Hulandes cu Gazprom lo caduca. GasTerra a pidi Gazprom varios biaha pa cumpli cu e termino di e contract, incluyendo acuerdonan di entrega y proceso di pago.
Mita di Gas Terra ta pertenece na Energie Beheer Nederland, cual su mes ta pertenece na e estado Hulandes. Un cuarto parti di GasTerra ta pertenece na Shell, di cual e resto ta di Esso. “GasTerra a dicidi di no cumpli cu Gazprom su terminonan di pago unilateral,” GasTerra a bisa den un declaracion. “Como respuesta na e decision aki, Gazprom a anuncia cu nan lo descontinua cu e suministro di gas efectivo for di dia 31 di mey 2022.”
GasTerra a splica cu pa por cumpli cu e terminonan di Gazprom, nan lo mester habri un cuenta den euro y otro den rubles na Gazprombank den Moscu. GasTerra a bisa cu esaki probablemente lo viola e sancionnan di e Union Europeo, y a agrega cu tin “demasiado riesgo financiero y operacional” den completa pago di e manera aki.
