(AP)—E agencia humanitario di UN a bisa cu e lo reduci su personal di 2.600 empleado cu ta traha den mas cu 60 pais cu 20%, pa motibo di “recortenan brutal” den fondo cu a laga un deficit di casi 60 miyon dollar.
Hefe humanitario di UN, Tom Fletcher, a bisa den un carta obteni diabierna pa The Associated Press cu “e comunidad humanitario ya tabata opera sin suficiente fondo, sobrecarga y literalmente bao atake” prome cu e ultimo recortenan den fondo.
Den e carta dirigi na empleadonan di e agencia, e no a nombra e pais cu ta responsable pa e recortenan cu a crea e crisis di fondo den e Oficina di Coordinacion pa Asuntonan Humanitario, conoci como OCHA, pero el a indica cu ta Merca.
Fletcher a bisa cu OCHA tin un presupuesto general di mas o menos 430 miyon dollar pa 2025, y cu varios pais a anuncia of a implementa recortenan na e fondo extra-presupuestario di e agencia. El a nombra specificamente Merca.
“El a bisa: ‘Merca so tabata e donante mas grandi di sosten humanitario durante decadas,’” y tabata e contribuyente principal na e fondo extra-presupuestario di OCHA, cubriendo mas o menos 20% — cu ta rond di 63 miyon dollar pa 2025. E no a bisa si Merca efectivamente a reduci e suma aki.
Bao di e administracion di Donald Trump, e Agencia pa Desaroyo Internacional di Merca (USAID), cu tabata responsable pa yudansa humanitario, a ser desmantela y fondo vital pa salba miyones di bida rond e mundo a ser reduci dramaticamente.
“Te awor, cu e salida proyecta di 258.5 miyon dollar, nos ta enfrenta un falta di fondo di casi 58 miyon,” Fletcher a bisa den e carta.
Mientras cu necesidadnan humanitario ta aumenta, Fletcher a bisa cu OCHA ya ta sinti e impacto di e recortenan riba acceso na “sosten vital.” Organisacionnan humanitario cu ta traha hunto cu UN ta keda afecta fuertemente, cu gruponan local “cargando mayoria di e peso,” sigui pa organisacionnan internacional y despues e agencianan humanitario mes di UN.
Fletcher a bisa cu OCHA tin cu reorganisa su operacionnan pa cuadra cu e recurso disponible, y lo bay reduci burocracia pa bira “menos pisa.” Esaki lo nifica un “reduccion substancial” di puestonan senior na e sede di UN y den algun region y paisnan.
“OCHA lo bay reduci nos presencia y operacionnan den Cameroon, Colombia, Eritrea, Irak, Libia, Nigeria, Pakistan, Gaziantep (na Turkia), y Zimbabwe,” el a bisa.
