(AP) – Reguladornan Frances a ordena Apple stop e benta di iPhone 12 bisando cu esaki ta emiti nivelnan di radiacion electromagnetico cu ta riba e standard di e Union Europeo pa loke ta trata exposicion na esaki. E compania a nenga esaki y a bisa cu e dispositivo ta cumpli cu e regulacionnan.
E agencia di gobierno Frances cu ta maneha frecuencianan di comunicacion wireless a duna e ordo despues cu iPhone 12 a fracasa den 1 di 2 tipo di test pa olanan electromagnetico cu e curpa ta capaz di absorbe. Te ainda no ta cla dicon e dispositivo cu a keda lansa den aña 2020 no a pasa e agencia su ultimo ronda di test ni tampoco dicon ta solamente e model aki no a pasa e test.
Francia su minister encarga cu areanan digital a bisa cu e iPhone 12 su nivelnan di radiacion ta sigui hopi mas abao cu e nivelnan cu estudionan cientifico ta considera dañino pa usuarionan y cu e agencia mes ta admiti tambe cu su testnan no ta refleha un uso tipico di e dispositivo. National Frequency Agency a emiti e yamado riba diamars na Apple pa “implementa tur e maneranan disponibel pa rapidamente drecha esaki” den e celularnan cu ya caba ta den uso y a bisa cu nan lo monitor e actualisacionnan. Si nan no traha, “Apple lo mester retira e producto for di mercado.”
E agencia recientemente a test 141 celular y a haya cu ora iPhone 12 ta den man of den saco, su nivel di absorcion di energia electromagnetico ta 5.74 watts per kilogram, cual ta mas halto cu e standard di e Union Europeo di 4 watt per kilogram. E celular si a pasa un test separa di nivelnan di radacion pa dispositivonan cu ta den un jacket of tas, e agencia a informa.
Limitenan pa cu radiacion ta stipula “hopi mas abao cu e nivel unda dano por tuma luga,” y pa motibo aki un nivel un poco mas halto cu e limite stipula ta “tiki probabel di tin cualkier consecuencia di salud,” Malcolm Sperrin, director di fisica medico na U.K Royal Berkshire Hospital Group a comenta. Usuarionan di iPhone 12 mester por descarga un actualisacion cu ta preveni cu e exposicion di radiacion ta surpasa e limite segun Sperrin.
No ta completamente cla dicon e model aki en particular tin e nivel mas halto di radiacion pero esaki “por ta a causa di e etapa inicial di e telefon unda e ta ‘buscando’ pa un senal sea ora di ricibi of transmiti,” el a splica. Apple a bisa cu e iPhone 12 a ser certifica pa varios curpa internacional y ta cumpli cu tur e regulacionnan aplicabel ademas di e standardnan pa radiacion rond di mundo. E compania di tecnologia Mericano a bisa cu ya caba nan a provee e agencia Frances cu varios resultado di laboratorio ehecuta ambos pa e compania y tercer partidonan cu ta comproba cu e celular ta den cumplimento.”
