(NLTimes)—E cantidad di casonan di sarampi den Europa probablemente lo subi den e proximo lunanan. E malesa ta circulando den un par paisnan Europeo, y no suficiente hende a ser vacuna contra e posibel malesa fatal den algun area, segun e European Centre for Disease Prevention and Control (ECDC) a adverti ayera.

Aña pasa, 2,361 infeccion di sarampi a ser diagnostica den paisnan miembro di ECDC, di cual aproximadamente 75% a ser reporta pa Romania, of 1,755 den total. E cifra ey a subi rapidamente e aña aki. E aña aki, seis hende a muri di sarampi na Romania, y un persona a muri na Irlanda.

“E plamamento na Romania ta andante desde mey februari 2023, y dia 5 di december 2023, e ministerio di salud a declara un epidemia nacional di sarampi,” ECDC a skirbi. “Cifranan mas recien for di e instituto di salud publico na Romania ta mustra cu e pais a detecta 4,679 casonan confirma entre 1 di januari 2023 y 6 di februari 2024.”

Romania tambe tin e gradonan mas halto pa capita, cu 92.16 infeccion pa cada miyon habitante. Liechtenstein a sigui cu 76.32, despues Austria (20.72), Belgica (5.94) y Estonia (3.0). Austria y Francia tambe a enfrenta nan mesun plamamento di sarampi. Entre 2020 y 2022, tabatin hopi menos infeccion debi na medidanan contra e coronavirus.

E riesgonan relata na sarampi ta particularmente halto den muchanan bao di e edad di 5 aña no vacuna, y hendenan cu sistema di immuun vulnerabel. Tin un riesgo abao pa modera di malesa y sintoma severo pa hendenan mas grandi cu 5 aña no vacuna of di ken nan sistema immuun no ta vulnerabel.

Na Hulanda, e vacuna contra sarampi a ser inclui den e Programa Nacional di Vacunacion desde 1976. Mas cu 80% di muchanan a ser vacuna contra sarampi. Un par di aña pasa esey tabata aproximadamente 90%. E grado di vacunacion entre baby tambe a cay pa menos cu 90%.

Na Hulanda tin un epidemia di sarampi aproximadamente un biaha cada 10 pa 15 aña. E epidemia mas recien a sosode na 2013. Plamamentonan asina ta particularmente presente entre gruponan di poblacion cu no ta haya vacunacion. Den pasado, esakinan tabata mas tanto hendenan for di comunidadnan religioso, ken ta mira vacunacion como un violacion di nan principionan. Den e ultimo añanan tin mas hende cu a cuminsa desconfia vacunanan y nan uzo.