Nacionnan Uni su Agencia di Refugiado ta bisa cu nan ta ‘profundamente preocupa’ pa e restriccion nobo pa Merca den situacion di asilo y cu ta pone den riesgo e famianan vulnerabel.
Comentario di ACNUR ta bin despues cu gobierno di Trump a bisa cu lo caba cu tur e proteccion di asilo pa mayoria migrante cu yega e frontera entre Merca cu Mexico.
Ta spera cu e regal, cu ta drenta na vigor, lo afecta hopi refugiado cu ta huy di e violencia y pobresa den Centro America. Sigur lo bay enfrenta desafio legal. Segun e plan, migrante cu pasa na otro pais, den e caso aki Mexico, no lo bin na remarke pa asilo pasobra nan mester a pidi asilo na Mexico prome.
ACNUR ta bisa cu e regla ta restringi e derecho pa solicita asilo y ta menasa e derecho pa no ser hiba bek na e pais unda nan por enfrenta persecucion.
