(TMZ) – Prins Harry y Meghan ta luchando contra un agencia di fotografia, cu ta bisa cu su fotografo freelance cu a persigui e pareha diamars anochi no tabata “sumamente agresivo,” manera Harry y Meghan ta alega.
Harry y Meghan su ekipo legal a manda un carta na e agencia Backgrid, bisando cu nan tin mester di e imagennan pa asina por mehora nan propio seguridad, agregando: “Nos ta exigi pa Backgrid inmediatamente otorga copia di tur potret, video y/of cualkier otro grabacion haci pa e fotografo despues cu e pareha a sali for di e evento y durante e siguiente varios ora.”
Backgrid su abogado a nenga e peticion bisando den un carta cu “Na Merca, manera mi ta sigur boso ta al tanto, propiedad ta pertenece na e persona cu ta doño di esaki; Tercer partidonan no por djis exigi pa duna nan esaki manera por ehempel un Rey por haci. Posiblemente bo tin cu sinta cu bo clientenan y splica na nan cu nan reglanan Ingles real di exigi ciudadano otorga nan propiedad na e corona a keda rechasa pa e pais aki hopi tempo atras.”
Backgrid ta bisa cu nan tabatin 4 fotografo den 3 auto y uno riba un bais, agregando cu nan “no tabatin intencion di causa ningun daño ni tampoco stress, mirando cu nan unico herment den man tabata nan camara.”
No tin base legal pa obliga Backgrid otorga nan imagennan, ni tampoco a otorga ningun demanda den nan contra cu ta rekeri esaki.
Anteriormente e ekipo di e pareha a yama e incidente cu e paparazzi “practicamente catastrofico” sinembargo fuentenan di New York Police Department ta bisa cu esaki ta un gran exageracion aunke alcalde di NYC, Eric Adams a bisa na paparazzi cu nan actonan tabata iresponsabel y peligroso. Tambe el a condena cu 2 oficial di e ekipo policial di NYPD por a keda herida, sin menciona cu Harry, Meghan y ciudadanonan inocente tambe por a keda herida.
