Agencia di modelahe SLV Models e ultimo aña a capta basta atencion pa diferente eventonan cu nan a participa, manera e habrimento di Aruba Vision Center na Verbindingsweg. Ademas e casting pa modelonan cual a haya un acogida grandi bou hobennan.

E agencia di modelahe ta enfoca riba un grupo di hobennan entre edadnan di 15 pa 28. Alabes e agencia mes ta uno masha hoben, existiendo oficialmente desde cuminsamento di e aña aki.

Bon Dia a combersa cu un di e 2 co-fundadonan di e agencia di modelahe, Kuro Muller, kende ta haya cu pa e nan e aña aki tabata un yen di oportunidad pa crece. SLV Models oficialmente ta existi desde cuminsamento di e aña aki, despues cu sr. Muller a traha un grupo di modelahe cu e ta traha cu ne na Hulanda regularmente. “Den exterior mi a haya chens pa traha cu modelonan di afo pero ora mi a bin cu vakantie pa un tempo bek na Aruba mi a pensa di cuminsa bek cu esaki y traha cu hende di Aruba. Na e altura aki SLV ta mi enfoke principal. Nunca mi a kere mi lo a haci e trabou aki riba e isla pero semper mi tabata inspira pa modelonan di Aruba. ”

Pa sr. Muller e agencia aki ta un manera cu e por ser conoci cu talentonan local y tambe internacional. ‘Ora mi tabata mas jong mi no tabata mucho social pa papia cu hende dus awo esaki ta un oportunidad pa expande mi circulo social y profesional’, e fundado ta conta nos. Pa e hoben, e ta haya traha cu e modelonan interesante pasobra hende cu no ta traha cu nan ta haya un imagen di un hende sumamente bunita y serio, mientras e trabou mes ta bay di manera ameno y te hasta cu par di hari aki aya. Pues e dualidad aki ta algo cu e ta haya interesante.

Hobennan modelo Arubano

Sr. Muller a haya basta inspiracion den pasado di movementonan di modelahe aki na Aruba, manera Aruba Model Search. E fundado a cuminsa cu e agencia pa via di su trabou personal como fotografo cu hopi biaha personanan lo duna comentario di no kere cu e modelonan ta di Aruba. Pero mas aleu e ta haya cu hende di Aruba tin hopi potencial pa ta modelonan hopi bon. Sr. Muller a agrega cu nan como agencia ta habri pa modelo di tur tipo y no ta discrimina a base di altura ni peso.

Esaki ta conecta cu e agencia su colaboracion cu hobennan cu apenas ta cuminsando cu nan carera den modelahe. Aunke pa artistanan cu tiki experiencia tin un pensamento cu nan por wordo paga cu ‘exposure’, e agencia di modelahe ta haci nan esfuerso maximo pa protege nan modelonan.

Ademas di kier traha cu hobennan Arubano den SLV, sr. Muller ta haya cu den un pais mas chikito tin mas oportunidad pa hende por eherce nan pasion mientras ta enfoca riba un grupo specifico cu por crece cu ne.

Aruba Fashion Week

Pa loke ta trata Aruba Fashion Week, sr. Muller a haya cu e evento tabata uno particularmente interesante. P’e fundado di SLV e diseñado local Rhona Lemminga tabata esun cu mas a hala su atencion. “Na cierto momento mi a wak un aviso riba caya di su nomber y djis pa via di wak e tipo di tela mi tabata sa caba cu ta su trabou. Esey ta algo cu ta hopi importante pa un diseñado.”

Aunke e evento a tuma consideracion cu diseñadonan local, sr. Muller ta haya cu nan lo por a envolve mas modelonan local tambe cu e evento.