(AP) – Un agencia Chino a test un taxi electrico cu ta bula na Dubai riba dialuna, ofreciendo un bista den e tecnologia cu posiblemente por ta disponibel den futuro, y lo hiba transporte publico na otro nivel.
XPeng X2, desaroya pa e compania basa na Guangzhou yama XPeng Inc su afiliado di aviacion, ta un di e decenas di proyecto tocante vehiculonan cu lo bula rond di mundo. Solamente un cantidad chikito a pasa door di e test exitosamente cu pasaheronan a bordo, y posiblemente lo dura un tempo prome cu nan ser aproba pa duna servicio.
Dialuna su demonstracion a ser organisa sin piloto, sinembargo e compania ta bisa cu nan a ehecuta un test cu piloto den e vehiculo den juli di aña 2021. Nan a diseña un vehiculo cu por carga dos pasahero y ta ricibi su poder pa medio di un set di 8 propeller. E compania a bisa cu e vehiculo por yega un velocidad di 130 kilometer pa ora.
Diferente na avion y helicopter, vehiculonan eVTOL of “electric Vertical TakeOff and Landing,” ta ofrece viaje personal di un punto pa otro, por lo menos den papel.
E vehiculonan aki sin piloto lo por algun dia hiba pasaheronan for di un punto den e ciudad te na otro punto riba di e trafico pega. Sinembargo e sector te ainda ta enfrentando varios desafio, manera e bida di e bateria, control di trafico aereo y siguridad, ademas di problemanan di infrastructura.
