Asociacion di Gasolin Dealers di Aruba “AGDA” mediante un comunicado pa prensa a duna nan banda di medaya di loke ta trata e stop di bendemento di e servicio coriente pre-pago na nan gasolin stacion, di otro banda, ELMAR a señala na Bon Dia Aruba cu e intencion di lansamento di Pay.Aw tabata pa introduci un opcion di pago adicional na nan clientenan cu ta prefera transaccion online.

AGDA a sigura cu e decision unanimo, pero lamentabel cu nan a haya su mes pa tuma dia 1 di februari 2024, no tabata un decision facil, pero si uno necesario.

Den e documento nan ta indica cu “for di augustus 2012 miembronan di AGDA a bin ta coopera cu ELMAR pa asina yuda ELMAR pa brinda coriente Pre-Pago na e comunidad di Aruba. Esaki inicialmente den forma di un programa piloto, despues a bay over na un acuerdo cu ELMAR caminda cu miembronan di AGDA lo a bira partner exclusivo di ELMAR den benta di nan coriente Pre-Pago.”

Nan ta menciona cu ELMAR su unico costo pa e bendemento di coriente Pre-Pago tabata nan programa y training, e gasolin stacion mes mester a cumpra un extra laptop, printer y suministra su mes cu papel tambe como recibo pa e clientenan di ELMAR y nan miembronan lo a bende e producto di ELMAR na comunidad, ricibiendo un comision dependiendo di volumen di benta.

“Desde 2017 pa awor e gastonan pa yuda ELMAR cu e benta di coriente Pre-Pago ta sigui subi sin cu ELMAR ta tuma nota di esaki, a pesar cu AGDA continuamente a acerca ELMAR pa discuti esaki. ELMAR continuamente ta ahusta su prijsnan a base di cu prijs di crudo ta subi of algo otro. AGDA su miembronan no tin e luho ey paso ta gobierno ta dicta nos margen di ganashi.” Nan a señala.

Un ehempel di e subida di costo pa por brinda e servicio di bende coriente Pre-Pago ta cu salario di trahado a subi, coriente a subi y gastonan bancario a subi drasticamente pa nan miembronan (y tur otro comerciante na Aruba) ora pago ta ser haci via carchi.

Nan a splica e situacion cu nan ta confrontando actualmente, mediante e siguiente ehemplo:

Si un cliente cumpra 100 florin di coriente na un gasolin stacion, e swipe esaki cu e carchinan nobo (Mastercard), esaki ta conduci na un gasto immediato pa e stacion di entre 2.7% pa 3.99% (depende di e banco) cu banco ta kita for di e gasolin stacion. For di e cliente su cuenta di banco ta kita e suma di 100 florin, pero e suma cu nos miembro ta ricibi riba su cuenta di banco ta 96.01 florin, pues aki ta surgi e prome perdida pa e gasolin stacion di 3.99 florin riba cada 100 florin di coriente.

“Pero nos miembro si mester paga ELMAR 100 florin, aki ta surgi e di dos perdida pa e gasolin stacion di 3.99 florin, sin conta e gasto pa e transferi e placa aki pa ELMAR. ELMAR ta paga e gasolin stacion 3 florin of 2.50 florin na comision y esey ta haci cu e gasolin stacion su perdida ta un poco menos, pero ta keda un perdida di 4.98 florin pa cada 100 florin di coriente Pre-Paga haci. Dus no solamente nos miembronan mester bende e producto di ELMAR, pero tambe mester financia ELMAR su operacion di benta na ELMAR su clientenan.”

Nan ta enfatisa cu asina mes despues di tanto contratiempo, nan miembronan a keda coopera cu ELMAR, pa e comunidad di Aruba, “pa asina facilita e benta na Aruba y comunidad por a cumpra coriente Pre-Pago cerca nos miembronan, pero cu e realidad di e gastonan bancario y otro gastonan cu nos miembronan ta enfrentando, lastimamente esaki pa hopi tempo caba no ta posibel mas.”

Pa loke ta trata nan comunicacion cu ELMAR, nan ta señala cu pa hopi aña AGDA ta purba convence ELMAR di e situacion dificil di nan miembronan cu benta di e coriente Pre-Pago, “pero e unico interes di ELMAR semper tabata di su mes.” Na september 2022 AGDA a sinta pa ultimo bes cu ELMAR pa purba ahusta e acuerdo cu a termina na 2018., den e encuentro aki cu directiva di ELMAR, despues di a reitera cu nan miembronan no por keda bende coriente Pre-Pago cu perdida, nan a ser bisa, sin ningun emocion, cu ELMAR ta perdiendo placa cu nan acuerdo y cu nan lo ta buscando un alternativa pa elimina e bendemento na e gasolin stacion.

“Esaki ta e manera cu nos compania estatal di coriente ta trata su partner den e benta di coriente Pre-Pago di mas di 10 aña?” Nan ta puntra.

Despues di e reunion aki a purba na varios ocasion di yega back na mesa via e-mail, carta etc. tur intento a keda sin ningun reaccion di parti di ELMAR, segun loke nan ta declara.

“Por fin tabatin señal di bida di parti di ELMAR ora cu dia 31 di januari 2024, despues di 4or di atardi, ELMAR ta manda AGDA un carta avisando cu desde e dia siguiente, esta 1 di februari 2024, coriente Pre-Pago lo por ser bendi na comunidad di Aruba pa medio di Pay.aw di SETAR y cu awor nan kier AGDA bin sinta na mesa cu ELMAR. Esaki ta un falta di respet, un insulto pa nos miembro nan di AGDA y nos directiva cu tabata un partner di mas cu un decada di ELMAR. Un sentimento cu cualkier persona den nos sapato lo por comprende ora di ser trata asina aki. Asina mes AGDA su miembronan a sigui bende coriente Pre-Pago dia 1 di februari 2024. E mesun atardi di dia 1 di februari 2024, den un reunion di urgencia nos miembresia den su totalidad a dicidi cu te aki nos a yega, awa a pasa hariña y nos no por sigui bende ELMAR su producto na un perdida mientras cu e trato ricibi di ELMAR ta indicacion cu nan no tin aprecio ni respet pa nos.”

Pa finalisa, nan ta expresa cu nan organisacion y su miembronan ta keda profesional y nan lo ta keda habri pa negosha cu un y tur inclusivamente cu ELMAR, pero pa awor nan decision ta keda firme.

Mientras tanto, Bon Dia Aruba a puntra na ELMAR tocante e trato cu Pay.Aw, si tabatin beneficio pa ELMAR pa cambia for di e gasolin stacion? Kico tabata e motivacion pa haci e cambio?

Ayera PR di ELMAR, Audrey Croes a sigura cu “ELMAR no a scoge pa termina e servicio di pago na gasolin stacion, AGDA a suspende e servicio aki sin notificacion previo. ELMAR a introduci un alternativa nobo di servicio di pago pa nos clientenan cu ta prefera transaccion online, e intencion tabata pa esaki bira un opcion di pago pa nos clientenan.”