AFTA a tuma nota di e señalnan den e medionan di comunicacion encuanto conductanan di, entre otro, SETAR, cual lo por ta contra di e Ordenanza encuanto Competencia (Mededingingsverordening), cu a drenta na vigor ariba 1 di januari di e aña aki. AFTA a invita SETAR pa un reunion.
Esaki segun un comunicado di prensa.
AFTA ta un organo gubernamental independiente cu ta supervisa e cumplimento cu e Ordenanza encuanto Competencia. E Ordenanza encuanto Competencia ta prohibi, entre otro, e abuso di parti di empresanan cu un posicion di poder economico. E empresanan cu un posicion dominante tambe por ta empresanan gubernamental.
Ora di tuma decision tocante e inicio di un investigacion, AFTA mester tene cuenta cu su capacidad limita y e impacto di posibel infraccionnan ariba e pueblo di Aruba. Mirando cu e Ordenansa encuanto Competencia ta un ley nobo, AFTA lo dedica tempo den futuro proximo na informa empresanan, entre otro, a traves di asociacionnan empresarial.
