Un bom laga na cant’i caminda a explota riba un bus, matando 32 persona, incluyendo mucha. Mohibullah Mohib, Vocero di Hefe di Polis na provincia Farah a bisa cu tin otro 15 herida y cu mayoria ta den situacion critico, indicando cu cifra por aumenta.
Ningun hende a tuma responsabilidad, pero ta kere cu Taliban, cual ta opera den e region, lo a laga e bom na cant’i caminda pa ataca trahado di gobierno y forsa di siguridad. E atake a bin despues di cu mision di Nacionnan Uni na Afganistan a publica un informe cu ta bisa cu mayoria di morto bou ciudadano (civil) ta causa pa forsa militar di e pais y nan aliado internacional.
Den un informe, Nacionnan Uni a bisa cu 403 civil a ser asesina pa forsa di Afganistan na e prome 6 luna di aña y otro 314 pa forsa internacional. Pues en total 717. Esey ta compara cu 531 asesina pa Taliban, grupo di estado Islam y otro grupo militar durante mesun periodo.
ONU ta bisa cu principal causa di morto pa civil ta pa enfrentamento riba tera, cual ta causa un den cada tres morto. Vocero di Presidente, Ashraf Ghani a bisa cu gobierno ta comprometi pa protege civilnan.
Sediq Seduqqi a bisa cu Taliban ta e causa prinicipal di e mortonan. El a pidi despensa pa e falta di siguridad na Afganistan durante operacion. El a acusa Taliban pa uza civil como ‘escudo humano’.
