Durante un conferencia di prensa ayera mainta, Aruba Food & Beverage Association (AFBA) hunto cu Departamento di Progreso Laboral (DPL) a anuncia un job fair cu lo tuma luga dialuna dia 20 di juni, cu tin como meta conecta e companianan cu ta buscando trahado cu e personanan cu ta buscando un trabao.

Lionel Croes, Marketing Manager di DPL, a splica cu DPL a ricibi un invitacion di parti di AFBA pa forma parti di e job fair cu AFBA lo ta organisando. E obhetivo principal di DPL ta su intermediacion tanto na e buscado di trabao como tambe na e dunado di trabao. Durante e job fair aki tanto dunado di trabao como esun cu ta buscando trabao por pasa busca informacion na e booth di DPL durante e job fair.

“Nos di DPL tambe lo t’ey presente pa brinda informacion y tambe pa registra esnan cu ta buscando trabao. Nos ta hopi contento pa forma parti pa asina DPL por sigui stimula participacion laboral, pasobra esaki ta e meta, e proposito, e vision di Ministerio. Ya caba for di 2011 DPL a bin ta brindando e servicio aki cu su team di job center pa sigui stimula participacion laboral”, Croes a expresa.

Segun Carolina Merryweather-Raven, presidente AFBA, a splica, e idea pa organisa e job fair aki ta algo cu a nace ya for di un aña pasa caba, pa motibo cu nan ta ripara cu tin hopi vacatura y nan miembronan semper ta buscando empleado, hendenan pa join nan compania y semper ta e mesun funcionnan.

El a remarca cu nan tin hopi funcion cu ta ripiti y nan ta wak tambe di parti di DPL di e proceso di permiso cu tin hopi persona cu ta buscando trabao. Esaki Merrywather-Raven a señala ta indica cu tin un buraco entre e personanan cu ta buscando trabao y e companianan cu ta buscando hende pa traha.

El a sigui splica cu e industria di hospitalidad y turismo ta un industria cu por ta ultimamente no ta popular of talbes hopi hende tin miedo di traha den e industria. Pa e motibo aki AFBA a tuma e decision pa organisa un job fair entre e miembronan di AFBA. Entre e companianan cu lo ta presenta na e job fair lo tin mas di 40 restaurant y entre nan lo tin restaurantnan nobo cu lo ta habriendo, cu no por habri ainda pasobra no tin staff. Lo tin tur tipo di posicion, cleaners, waiters, barista, areanan den cushina entre otro y diferente nivel tambe.

E area di cushina, Merryweather-Raven a resalta, ta un di e areanan cu ta presenta mas problema pa haya empleado cu tin e conocemento corecto, pero el a enfatisa tambe cu nan, e companianan, ta na e punto aworaki unda nan kier siña e hendenan cierto habilidadnan pa por tuma e tipo di posicionnan aki.

E job fair aki lo tuma luga dialuna 20 di juni for di 11or di mainta te cu 8or di anochi den Rennaissance Convencion Center. Pa mas informacion of cualkier pregunta por bishita e website jobfairaruba.com

“Ta hopi importante pa remarca cu aunke un persona no sa mucho di e industria di hospitalidad y turismo, pa toch asisti na e job fair unda cu por combersa cu diferente companianan cu ta buscando trahado den diferente posicion”, el a agrega.

Merryweather-Raven a indica tambe cu hopi biaha nan ta saca vacatura y nan ta ricibi hopi aplicacion, pero e aplicacionnan por ta no ta indicativo na e posicion cu nan ta buscando. El a splica cu esaki no kiermen cu nan no mester di hende of cu persona mester stop di busca. Den casonan asina e ta nifica cu e persona no tin e cualidadnan pa e trabao specifico ey, pero por ta e tin cualidadnan pa otro posicion.

Tambe tin e situacionnan na unda hopi persona ta manda nan CV hopi biaha y despues nan no ta mand’e mas, pasobra nan a cansa di manda nan CV. “Si esaki ta e caso pa algun persona, no descurasha, asisti na e job fair. Hopi biaha un impresion den persona ta yuda”, el a agrega.

Na e booth di AFBA lo tin un representante cu lo ta disponibel pa yuda tur esunnan cu asisti na e job fair cu no tin un CV of no sa con pa traha un. E representante lo ta encarga pa yuda e persona pa den un tempo cortico traha un CV cu tur nan informacion necesario pa por aplica pa un posicion di trabao.

Durante e job fair lo tin tambe dos seminario, Merryweather-Raven, a informa. El a indica cu como asociacion nan a ripara durante procesonan di entrevista cu hopi hende no tin e conocemento corecto pa con presenta nan mes durante un entrevista di trabao y esey por haci cu un persona cu tin tur e cualidadnan no ta wordo tuma pa e trabao, djis pa e simpel motibo cu nan no tabata sa con pa presenta nan mes.

Nadine Willems, coach di personal development lo ta dunando e seminario titula ‘How do I increase my chances get a job’. E seminario aki lo enfoca den brinda e personanan e hermentnan necesario pa nan por prepara nan mes pa un entrevista di trabao. E seminario lo ta completamente gratis y lo tuma luga for di 3or pa 4or di atardi. Tur interesa mester pasa na e booth di AFBA pa registra pa por forma parti di e seminario.

Pa e miembronan di AFBA mes lo tin un seminario tambe titula ‘Giving light to your employer brand’. Merryweather-Raven a señala cu hopi biaha companianan ta bisa cu nan no por haya hende pa traha, pero den e mesun compania tambe tin ora nan ta haciendo algo cu no ta bon pa retene e empleadonan of mantene e empleadonan contento.

El subraya cu den e industria di hospitalidad tin scarsedad di personal y esaki ta parti di e motibo principal pakico AFBA a contact DPL pa forma parti di e job fair. “E motibo principal pakico nos a contact DPL tambe ta pasobra nan ta bisa cu nan tin hende cu no tin trabao. Con nos por haci e conexion pasobra nos mester di hende y tin hende na cas cu no tin trabao. Con nos ta conecta cu otro ta via e job fair”, el a agrega.

Por ultimo Merryweather-Raven a remarca cu turismo ta lo mas importante pa Aruba y e pais mester di e ayudo y apoyo di tur pa sigui bay dilanti. “Hopi biaha nos no ta realisa pero economicamente nos pais ta depende di nos y si nos no haya e amor back pa traha den hospitalidad y nos no ta duna back na e parti di turismo e ora ey nos no ta bay crece”, el a bisa. “Nos industria ta creciendo keto bay. Aruba ta hopi popular y nos mester sigura cu ora nan yega nan ta haya e servicio di calidad y na e momentonan aki nos ta short”.

.