Den nos edicion di ayera nos a publica un articulo tocante e conferencia di prensa di Aruba Food & Beverage Association (AFBA) na unda COO di AFBA, Miriam Dabian, a trece pa dilanti e preocupacion di e organisacion pa loke ta trata escasez di personal den e sector di horeca. Durante e conferencia di prensa, miembronan di prensa a haci algun pregunta relaciona na e situacion di stranheronan cu ta na Aruba, cu no tin status legal (indocumenta), pero cu si ta dispuesto pa traha den e sector aki.

Manera ta conoci e grupo di indocumentadonan na Aruba ta grandi y e grupo aki, na varios ocasion a vocifera nan deseo pa uni na e mercado laboral y contribui na economia di Aruba. Sra. Dabian a splica cu AFBA tin comprendemento di esaki, pero AFBA y su miembronan no por contrata un persona sin permiso pa traha.

El a remarca cu pa e motibo ey nan ta papiando y deliberando pa mehora e procedimento pa no trece mas hende di afo siendo cu tin persona, hasta profesional na Aruba mes, pa yena e vacaturanan, pasobra trece hende di afo por nifica un proceso largo y costoso pa un compania.

Dabian a expresa, for di su punto di bista cu e sistema cu tin actualmente, ora cu trata di procesonan pa saca permiso, ta burocratico. “Tin caminda cu por mehora y esey nos ta purbando y nos ta mustrando unda nos ta haya obstaculonan na caminda pa por surpasa e obstaculonan aki pa e persona cu ta solicitando e trabao por haya trabao lo mas pronto posibel y asina nos ta yena e necesidad di nos socionan,” el a bisa.

El a resalta cu como dunadornan di trabao nan ta prefera di busca empleado cu no mester permiso pasobra e situacion ta dificil y na momento cu mester pidi un permiso, actualmente e solicitud por dura dos pa tres luna y den hopi ocasion hasta mas. Esaki ta inclui peticion nobo of pa cambio di trabao of pa extension.

Dabian a splica cu e problema cardinal cu nan tin cu e proceso di saca permiso ta e trayectoria di pidi un permiso te ora cu nan haya un permiso, locual ta tarda y por ta costoso. Di otro banda el a remarca cu nan no por fomenta contrata personal sin permiso y si tin mas Arubiano ya solicita, Arubiano nan lo tuma.

“Bo por bisa den tur negoshi bo ta haya e mescla di Arubiano, e hendenan cu tin añas na Aruba cu tin firma liber. Pero e problema ta e vacaturanan cu nos tin nos no ta hayando hende pa cubrinan,” el a señala.

Miembro di AFBA presente na e conferencia di prensa a remarca cu aworaki un persona stranhero ta haya e prome permiso, locual ta un mehoracion pasobra tabatin un tempo cu nan no tabata haya ni e prome permiso mes.

Pero aworaki tin otro problema, cual ta cu e persona mester traha cu e mesun compania pa tres of cinco aña. “Esey ta fastioso pasobra algo por pasa of e persona kier bay of e compania no ta contento mas cu e persona ey y mester tin oportunidad pa cambia e permiso mas lihe,” el a indica.

Un problema ta agrega na otro y ta haci e preocupacion mas grandi mirando cu tin mas hotel cu ta na caminda y esey ta aumenta e demanda di personal, algo cu ta alarma e organisacion.

Den un articulo publica den nos edicion di 29 di juni 2023, cu ta carga e titulo “Minister Glenbert Croes: E tema di carrying capacity mester a wordo pensa prome cu a duna permiso pa tur e hotelnan.”

E articulo aki ta trata di un reunion publico cu a tuma den Parlamento di Aruba na unda Minister Glenbert Croes a presenta e manual di admision nobo cu a drenta na vigor dia 1 di februari, na unda ta delinea e politica y maneho pa admision y integracion.

Pa loke ta e tema hotel y carrying capacity, e lider di fraccion MAS, Marisol Lopez-Tromp, a trece pa dilanti durante su ronda di pregunta cu carrying capacity tin hopi di haci cu e tema di admision y integracion.

Minister Croes a splica cu e carrying capacity pa loke ta trata hotelnan a ser defini pa e cantidad di hotel cu tin den realisacion. No obstante e presion riba carrying capacity cu esaki ta ocasiona, el a resalta cu e no por cera su wowo como Minister di Labor cu hotelnan ta wordo construi y mester trahado pa construccion y pa operacion di e hotel.

“Nos yiunan di tera ta hayando hopi trabao, pero e realidad ta cu tin hopi mas trabao cu tin trahado y esey ta e motibo dicon ta treciendo trahado di afo,” el a subraya.

El a trece pa dilanti cu indicacion den e analisis di cifranan di mercado laboral hopi persona cu tabata cay den e grupo di hendenan inactivo den e mercado laboral, cu no tabata buscando trabao, aworaki ta buscando trabao y ta hayando trabao.

Pa loke ta e pregunta di palabracionnan cu Gobierno di Aruba tin cu hotelnan, Minister Croes a splica cu e tin contacto cu tur y cu e ta traha di cerca cu tur y su meta ta percura pa tin trahado pa tur hotel.

El a remarca cu e ta kere cu e politica di integracion responsabel ta ser midi pa e cifra di desempleo, pasobra esey ta mustra cu e ta bahando a pesar cu ta haciendo un integracion efectivo di stranhero den mercado laboral; e cifra ta demostra cu e yiunan di tera ta hayando trabao na prome luga, pero no obstante ta integrando tur hende cu ta fisicamente akinan caba.

“E unico cos cu mi por bisa cu ta determinante pa Ministerio di Labor, ta cu nos tin asina hopi proyecto di hotel cu mester trahado y mi tarea ta traha cu nan pa nan tin trahado. E tema di carrying capacity mester a wordo pensa prome cu a duna permiso pa tur e hotelnan, honestamente. Aworaki hotelnan ta wordo construi y nan tin cu wordo opera. E ta un realidad cu mester biba cune. Mare nos por a hiba e discusion aki prome cu e permiso di e hotelnan ey a wordo duna,” el a enfatisa.