Aruba Food & Beverage Association (AF&BA) despues di e reunion cu formado sra. Evelyn Wever-Croes den cuadro di combersacionnan cu stakeholders a trece dilanti cu tin un situacion straño unda pa via cu no tin leynan laboral flexibilisa pero tampoco ta tumando peticionnan nobo pa permiso di trabao, tin persona cu no a logra renoba nan permisonan pa via di Covid, pero cu dunadonan di trabao no por kita for di trabao. Daniel Ferrara di AF&BA ta boga pa resolve e problemanan aki cu solucionnan pragmatico pa economia por drey optimalmente.

Ferrara ta trece dilanti cu Aruba su turismo ta yegando 100% di su capacidad prome cu Covid, of hasta mas, te na un maximo di 120% di loke e tabata prome cu Covid. Esaki kiermen cu na e momento aki ta crucial pa tuma accion pa entre otro flexibilisa e leynan laboral pa asina por tin mas competencia riba mercado laboral.

Flexibilisacion den opinion di AF&BA mester tambe bay man den man cu un maneho pa optimalmente curasha localnan pa bay bek trabao, maske tin indicacionnan cu pa via di FASE, subsidio di salario y pakete di cuminda, tin hopi hende ta prefera pa cobra esakinan y haci trabao na ‘zwart’ na banda. Ferrara ta haya cu entre e personanan cu no tin trabao y e empresanan cu mester di hende pa traha gobierno mester interveni pa asina e dos puntanan por haya otro.“Eynan mi ta kere tin un brug cu aworaki no ta wordo atendi”, Ferrara a comenta den e conferencia.

Ferrara no ta solamente recomenda pa atende cu e asuntonan aki pa via di e reactivacion di economia, si no cu tambe tin varios proyecto di hotel cu ta pendiente cu tambe mester bay wordo yena cu trahado, tanto na Palm Beach como na San Nicolas.

Stop completo di peticion pa permiso ta un problema pa dunado di trabao

Algo cu Ferrara a trece dilanti despues di pregunta di Bon Dia, ta cu tin un situacion poco cla ora ta trata di e maneho di permisonan. Ta conoci cu desde november aña pasa a anuncia un maneho cual ta encera cu hopi peticion pa renobacion di permiso no lo wordo honra, dependiendo si e persona tin menos cu 5 permiso. Tambe peticionnan nobo a stop completamente.

Pa e miembronan di AF&BA esaki ta crea un situacion poco cla, unda segun Ferrara, tin cantidad di trahado cu no por a renoba nan permiso pasobra nan no a cay den e regla di 5 permiso, pero cu na mes momento pa via di e falta di flexibilisacion laboral, ta bira imposibel pa e dunado di trabao kita e persona di trabao.

“Algun di nos miembronan ta haya cu na fin di dia mester tin hende pa atende cu clientenan. Mirando cu no tin hopi motivacion pa bay traha den sector turistico pasobra nan ta ricibiendo fase, cierto miembronan ta pensa cu no ta keda na mas si no pa yuda e hendenan cu no tin documento pa nan traha pa por atende e aumento den clientela. Anos mes como AF&BA kier mira na prome instante pa e localnan, e Arubiano, haya trabao prome cu bay over na duna un persona sin documento un permiso temporal cu no lo ta permanente pa asina por atende cu e mercado creciente.”

Pues ora cu e 4000+ persona cu ta riba FASE wordo guia pa haya trabao, despues Ferrara ta mira un oportunidad pa duna un tipo di pardon na e personanan cu ta indocumenta na Aruba, cual ta un grupo creciente.