U.S. Customs and Border Protection (U.S. CBP) a duna inicio na e proyecto piloto di Facial Biometrics Entry na Aeropuerto Internacional Reina Beatrix. Esaki lo uza tecnologia di reconocimento biometrico di cara pa verifica e identidadnan di e biaheronan cu ta bay bek pa Merca for di Aruba. Esaki ta segun e relato cu nos a ricibi.
Despues di e implementacion exitoso pa U.S. CBP di e proyecto piloto di reconocemento biometrico na diferente aeropuerto Mericano, U.S. CBP a scoge aeropuerto di Aruba como e prome aeropuerto pafo di Merca pa haci e test di e tecnologia di reconocimento biometrico facial. Mescos cu e implementacionnan anterior di e tecnologia aki, pasaheronan ta ansioso pa participa den U.S. CBP su proceso di entrada/salida innovativo. E proyecto piloto aki lo wordo getest cu pasaheronan riba e vuelo di Delta pa John F. Kennedy International Airport, cu ta opera diariamente.
“Nos ta hopi contento cu U.S. CBP a scoge pa haci e proyecto piloto di e tecnologia aki na Aeropuerto di Aruba. Nos a haci uzo di e tecnologia aki e ultimo añanan na diferente punto di control di frontera na aeropuerto, y e proyecto piloto aki lo ta instrumental pa hiba nos aeropuerto na e siguiente nivel di siguridad y servicio na e pasahero; y pone nos riba e rumbo pa bira un di e miho aeropuertonan cu ta ofrece U.S. pre-clearance.
Nos experiencia cu e sistema biometrico tabata hopi exitoso den pasado y nos ta ansioso pa por traha den colaboracion cu U.S. CBP riba e proyecto piloto, y nos ta spera cu nan lo ta exitoso den implementa e tecnologia aki den su totalidad,” asina director di Aruba Airport Authority James Fazio a bisa.
