Lo inicia un proyecto di mas cu 12 miyon florin na Aeropuerto di Aruba, cual ta encera rehabilitacion di e posicionnan di parkeer 1 y 2 na balor di 7 miyon dollar.
Lo cambia e superficie di concret, instalacion di e infrastructura pa e fuel hydrant system y e realocacion di e fundeshi nobo pa e brugnan pa pasahero asina aumentando e tamaño di Gate # 2 pa acomoda avionnan tipo wide-body di categoria “E” manera avionnan B-787 y A-330. Lo instala 2 brug di pasahero nobo. “Henter e inversion aki ta forma parti integral di e programa continuo di mehoracion na Aeropuerto, den nan esfuerso pa renoba partinan cu ta birando bieu y mehora flexibilidad di e facilidadnan”, asina Minister Ing. Mike de Meza a splica. Awe dialuna lo cuminsa cu fase # 1 cu ta encera cu ta cera posicionnan di parkeer avion # 2 y # 3 pa 6 siman largo. Ora cu fase 1 keda cla, fase 2 lo cuminsa, unda cu gate 3 lo bolbe den servicio mientras cu gate 1 y 2 lo keda cera pa un periodo di 4 luna. Si tur cos cana segun schedule, dia 14 di december 2017 e proyecto mester ta completamente cla y entrega.
Ta bon pa agrega cu ceramento di e gatenan lo trece un cantidad di reto pa e operacionnan diario na aeropuerto, pero lo adapta operacion pa por minimalisa impacto riba pasaheronan y riba operacion di avionnan. “Cu e inversion grandi aki den nos economia y den mehoracion di e servicio na Aeropuerto, nos ta convenci cu Aruba Airport lo ta cla pa por sirbi avionnan mas grandi durante e temporada peak di winter, asina cu entrega e proyecto aki na December proximo”, di acuerdo cu Minister Ing. Mike de Meza. E ta felicita gerencia y empleadonan di Aruba Airport Authority N.V. pa nan dedicacion y compromiso serio den brinda servicio optimal y den percura pa mantencion continuo di e facilidadnan. No ta pornada cu Aruba ta sigui gana premio a base regular pa e forma profesional con ta maneha nos Aeropuerto y tur esfuerso cu e empleadonan ta haci diariamente pa mantene e nivel di servicio asina tambe.
