Aeropuerto prepara cu tur protocol y medida di prevencion pa habri

Ayera den oranan di atardi, Aruba Airport Authority N.V (AAA) a anuncia cu despues di tres luna cu fronteranan a wordo cera pa via di e pandemia coronavirus, dialuna awor 15 di juni Aeropuerto Reina Beatrix lo habri su portanan pa pasaheronan por bin for di Corsou y Boneiro primeramente.

Asina Joost Meijs, CEO Aruba Airport Authority N.V. a expresa durante su discurso, den cual el a splica cu e ta compronde e posicion cu gobierno tin pa ekilibra aspectonan di siguridad y economia.

“Comunidad di Aruba mester di e hendenan, di e pasaheronan cu ta crea trabou y ta genera entrada”, Meijs a bisa, asina como tambe a trece dilanti cu e motor di Aruba por inicia pero e por bin den pasonan chikito.

Pa luna di juli nan ta spera di aproximadamente 500 pasahero pa dia, cu despues lo por aumenta. Pero ta dificil pa calcula y determina ki dia aeropuerto lo por bin bek na e numbernan cu tabatin prome cu e pandemia Covid-19.

Di loke ta trata siguridad, Meijs a comenta cu aeropuerto lo inicia di un forma sigur, cu mester ta bon prepara pa tur usuario di aeropuerto, pa empleadonan di aeropuerto y pa comunidad di Aruba mes. E obhetivo cu nan tabatin tabata pa aeropuerto reinicia dia 1 di juni, di mesun manera nan a redefini nan politicanan y procedemento pa pasaheronan pa loke ta trata normanan di distanciamento social.

Dangui Oduber, minister di Turismo, a ofrece algun palabra pa medionan local pa bisa cu esaki ta un momento importante pa pais Aruba. Despues di e tres luna cu fronteranan a wordo cera, na e momentonan aki el menciona cu nan a amplia e capacidad di cuido y protocol pa tur sector y asina limita e risico di importacion di casonan di Covid-19 mas tanto cu ta posibel.

Tocante e medidanan, Oduber a trece dilanti cu na e momento cu un turista yega of un persona local lo yega Aruba bek ta bay exigi un pre-screening, Embarkation – Disembarkation card, Self Health Declaration Form, mester bisti mondkap y seguro medico obligatorio pa cubri Covid-19 Insurance.

Riba e seguro obligatorio aki, cu ta bay cubri eventualmente e gastonan medico si un turista ta bira positivo y mester di cuido den hospital, e ta bira obligatorio pa tur turista cu excepcion di studiantenan. Pero pa tur otro persona incluyendo Arubianonan cu ta biba na Hulanda of Merca, esaki ta bira obligatorio. Islanan como Corsou y Boneiro ta wordo exclui pa via di un acuerdo cu Aruba a haci cu te ainda ta den estudio, segun Oduber a señala.

Den momento cu e persona ta yega Aruba, Oduber a relata cu e mester haya un test pa midi temperatura, nan ta bay test riba sintomanan, nan ta bay haci preguntanan pa via triage y tambe haci PCR test na e momento cu turista ta yega y si un persona ta nenga di test e ora ey e tin cu bay 14 dia den cuarentena cu indicacionnan di DVG, pa motibo cu huridicamente no por obliga ni un hende pa haci test.

“Di e manera aki, por filtra e casonan positivo pa evita cu nan lo yega te hotel pa haci check-in”, Oduber a sigura.

Tambe el a bisa cu nan ta stimula pa turistanan haci e test prome cu nan biaha na Aruba, cu nan por pone adhunto den e ID card prome cu nan lo yega, pa ora nan yega no lo haci e test y warda pa e resultado.

Segun Oduber a declara, seguronan a duna un indicacion caba di kico lo por bira e prijs pa e seguro. Nan ta trahando riba un pakete pa famia, por ehemplo, si un famia di 5 miembro ta bin, por ta nan ta haya esey den un pakete. Di esaki e tambe a comenta cu nan ta reuniendo tur dia cu companianan di seguro, pa motibo cu minister kier e compromiso di nan banda pa wak si nan ta dispuesto pa brinda e cobertura aki di Covid-19, door cu ta hopi dificil pa convence e companianan di seguro.

“Ningun seguro ta cubri pandemia, di manera cu no tabata facil pa nos por yega akinan y tur companianan di seguro na Aruba a mustra interes pa participa.” Tambe a menciona cu den transcurso di siman nan lo informa pa comunidad kico ta exactamente e opcionnan pa wak si nan ta ofrece e seguro pa dia pa persona of den pakete.

Di loke ta trata Corsou y Boneiro, cu a tuma e decision te na e momentonan aki cu si Aruba dicidi pa habri frontera cu Merca nan lo cera frontera entre Aruba y Corsou y Aruba y Boneiro, Oduber a bisa: “Nos ta lamenta esey pero, nos tin otro mercado distinto cu esun di Corsou y Boneiro, Aruba y Saint Maarten ta depende di mercado Mericano y Corsou y Boneiro di mercado Europeo.”

Loke Oduber y Aeropuerto kier ta pa comunidad sinti sigur y trankilo, pa motibo cu tin cierto hendenan den comunidad cu a keda cu miedo pero el a afirma cu nan a haci tur loke tabata den su alcance pa limita e riesgo.