Minister demisionario di Turismo, Dangui Oduber (MEP) a confirma na noticiero local NoticiaCla cu a cuminsa formalmente cu e buskeda pa un CEO nobo, despues di retiro di ex-CEO, Joost Meijs, kende a bandona Aruba despues di cinco aña a cargo di aeropuerto.

Desde retiro di Sr. Meijs, tin un management team consistiendo di tres persona, Sr. Jurgen Benschop, Barbara Brown y Aisha Anthony.

Notorio den e situacion ta e hecho cu, segun NoticiaCla, aeropuerto di Aruba ta buscando e CEO riba su mes, y no a traves di Royal Schiphol Group – siendo cu segun contract, ta RSG mester presenta un CEO nobo. Sinembargo, no tin claridad pakico RSG no a presenta un CEO nobo.

Fin di januari ultimo, tabatin indicacion cu e relacion entre Aruba y Royal Schiphol Group ta bao presion significante. E conflicto entre e gabinete demisionario di Prome Minister Evelyn Wever-Croes (MEP) ya a alcansa un punto critico, cu Schiphol Group menasando di bandona Aruba na juni proximo.

Esaki a keda reporta riba portal noticiero Aruba.nu. Segun e relato, lider di AVP, Mike Eman a expresa preocupacion pa e impacto potencial cu e retiro di Schiphol Group lo tin riba e posicion economico y strategico di Aruba.

Desde april 2004, Royal Schiphol Group, propietario y operador di aeropuerto Schiphol na Amsterdam, a mantene un relacion strategico cu Aruba Airport Authority (AAA), cu ta maneha Aeropuerto Internacional Reina Beatrix. A traves di e colaboracion aki, Royal Schiphol Group ta provee management y sosten tecnico na aeropuerto di Aruba. Schiphol a hunga un rol clave den desaroyo di Aeropuerto Reina Beatrix, mehorando profesionalismo, innovacion y eficiencia.

Segun e relato di Aruba.nu, den un carta manda december ultimo, Schiphol Group a anuncia su intencion pa termina e acuerdo, citando un relacion afecta severamente cu gobierno di Aruba. Eman ta atribui e conflicto aki na minister demisionario di Turismo, Dangui Oduber (MEP), acusando e minister di permiti pa e conflicto escala. E ta nota cu e relacion aki tabata estableci na 2004 pa un gobierno anterior di MEP, lidera pa Nel Oduber.

E tempo aya, minister Dangui Oduber a skirbi riba su pagina di Facebook aludiendo na e hecho cu lo tin motibonan hopi serio pakico e relacion cu Schiphol Group no por a continua.

“Lo ta bon pa co-formador Eman splica tambe kico ta e condicionnan cu Schiphol a pone pa nos cu a conduci na e patstelling cu negociacionnan a tranca! Un patstelling similar na e negociacion entre AVP y Futuro,” e minister a indica. “Si e no kier splik’e cu gusto lo mi splica cu tur luho y detaye pakico NO por acepta e condicionnan di Schiphol cu ta bay hopi leu!”

Manera menciona, e partnership cu Schiphol Group a cuminsa originalmente bao mando di ex-prome minister di MEP, Nelson Oduber na 2004. Siguiendo e sucesonan den noticia, e ex-mandatario tambe a duna un reaccion riba su rednan social.

Den un mensahe largo, el a splica cu tempo cu el a drenta gobierno na 2001, a traves di bon contacto na Hulanda el a dicidi pa acerca Schiphol Group pa puntra nan si nan kier a bin maneha e aeropuerto y a splica nan tur e problemanan cu tabatin e tempo aya. E grupo aki tabata maneha hasta parti di aeropuerto di New York y varios otro pais, segun Oduber a splica, y asina a negocia y trece e grupo na Aruba. “Den menos cu 2 aña cu nan a bin nan a yuda drecha e desaster di e dak, bañonan, etc. y AAA NV a cuminsa gana placa, unda hasta gobierno a haya parti di e ganashi.”

Sinembargo, el a bisa cu un par di aña pasa el a recomenda gobierno pa re-negocia e contrato, evaluando si ainda ta beneficia ambos banda y si tin balor agrega pa Aruba.

E tension entre aeropuerto y RSG ta continua, segun medionan local e siman aki. E disputa central ta riba e placa cu mester paga RSG, y e hecho cu un exigencia den contract tabata pa tin un CEO Arubiano, pero esaki no a sucede. A surgi un impasse y esaki a pone cu no a firma un contract nobo na december, manera tabata programa.

Awo cu minister Oduber a confirma cu aeropuerto sin RSG ta buscando e CEO, ta un indicacion cu e impasse no lo a keda resolvi, y tin peliger cu RSG lo bandona Aruba.