Durante oranan trempan di mainta di ayera diahuebs, 18 di januari 2024, Aeropuerto di Aruba a confronta problema cu e sistema di airco, esaki a causa cu e temperatura den e facilidadnan di Aeropuerto a baha bou di loke ta necesario pa garantisa e siguridad di un y tur.

Mediante un comunicado, Aeropuerto a informa cu e falta di funcionamento di e sistema di airco tabata expone e pasaheronan y e personal di aeropuerto na condicionnan insigur debi na e temperatura eleva.

Ademas, e presencia di awa condensa riba e vloer di e terminal a crea peliger pa slip, haciendo e riesgonan pio ainda.

Debi na esaki, pa garantisa un situacion sigur y stabiel p’e pasaheronan y personal di aeropuerto, esnan encarga cu e maneho di aeropuerto a tuma e decision pa stop cu e procesonan regular di aeropuerto y cera e pista di te na momento cu mester a drecha e sistema di airco y por garantisa cu e temperatura ta bolbe na nivel regular paden di e edificio.

Pa 8:45am di mainta a cera aeropuerto pero e operacionnan a reinicia pa 12:00pm cu e procesonan di check-in, e procesonan y operacion di terminal como tambe di pista a reinicia pa 12:30pm.

Motibonan di pakico sistema no tabata funciona
 E proceso di reparacion a tuma luga e anochi di 17 pa 18 di januari, cu e meta di soluciona un likmento riba un di e chiller pipes. Sinembargo, e proceso di reparacion durante anochi a confronta un complicacion tecnico imprevisto, e desafio aki a stroba e resolucion oportuno di un lik di e tuberia y stroba e proceso pa reanuda e sistema di airco cu ta esencial pa e operacionnan actual di aeropuerto.

Alrededor di 11:15 am a drecha e likmento y por a reinicia e sistema di airco pa fria e edificionan, nan lo evalua minuciosamente e trabounan di reparacion realisa y e dificultadnan cu nan por haya. Cualkier resultado di e evaluacion lo resulta como medida pa impedi cu tipo di situacionnan similar lo sosode.

Impacto pa e biaheronan y pa e aerolineanan
 Debi na problema di airco, e proceso di check-in pa e vuelonan programa pa sali alrededor di merdia a sufri algun retraso, e operacionnan di e avionnan durante nan yegada tambe a sufri algun retraso.

Aproximadamente 10 vuelo Mericano y algun operacion di vuelo non-U.S. tambe a sufri retraso. E pasaheronan cu ya caba tabata na aeropuerto tabatin e opcion pa sigui warda den e comodidadnan di hotel Hyatt Place te na momento cu a inicia cu e proceso di check-in. Ambos area di espera, hotel y aeropuerto, a ofrece bebida y snacks como cortesia na e pasaheronan afecta, tambe mester a desvia algun vuelo cu mester a pasa di transito pa Aruba, un a bay Corsou y dos pa Puerto Rico, den esaki, e vuelonan desvia a yega Aruba ayera mes. Aeropuerto no a experencia ningun cancelacion y ta spera cu e demas operacionnan di aeropuerto lo sigui a pesar di e retrasonan actual.

Aeropuerto di Aruba ta encurasha tur pasahero pa verifica e orarionan di yegada y salida a traves di nan website www.airportaruba.com.

Management di aeropuerto a ofrece su disculpa pa cualkier inconveniente causa na e pasahero, usuario di aeropuerto y su personal.

Aeropuerto di Aruba ta un di e aeropuertonan mas ocupa den region Caribe cu mas di 22 diferente aerolinea operando pa Aruba contribuyendo na mas cu 2.5 miyon pasahero pa aña y cu vuelonan pa 22 diferente ciudad 34 diferente destinacion directo rond di mundo. E mercado di Aeropuerto ta sirbi pa 76% di Merca y Canada, 14% di Latino America, 6% for di Europa y 4% for di Antia Hulandes te cu luna di december 2023.