(RCN) – Fuentenan di Aeronautica Civil a confirma cu e aerolinea Conviasa, funda 18 aña pasa pa e presidente na e momento ey Hugo Chavez, te ayera no tabatin autorisacion pa aterisa den teritorio Colombiano, den marco di reapertura di frontera entre Venezuela y Colombia cu lo tuma luga dialuna awor 26 di september.
Un di e motibonan ta cu aerolinea aki, cu lo a mester cubri e trayecto Caracas-Bogota, ta inclui den e lista Clinton, for di aña 2020, tempo cu Donald Trump tabata presidente di Merca.
E sancion na e aerolinea Conviasa (Consorcio Venezolano di Industria Aeronautica y Servicio Aereo) a tuma luga durante luna di februari, di parti di Oficina di Control di Activo Stranhero di Merca, e cual a inclui Conviasa den e lista Clinton.
Di acuerdo cu e argumentonan di Merca pa duna sancion na Conviasa, “e aerolinea aki ta esun encarga di transporta funcionarionan diplomatico y corupto di gobierno Venezolano pa diferente parti rond di mundo”.
Ta asina cu, pa evita cualkier tipo di sancion of represalia di parti di Merca pa Colombia, lo mester a trek e decision cu ya caba a wordo duna di parti di autoridadnan di Transporte na e pais.
Pa via di e decision aki, a confirma pa fuentenan di ministerio di Transporte cu ayera diabierna den oranan di atardi lo a mester reuni e presidente Gustavo Petro y minister di Transporte, Guillermo Reyes pa analisa e situacion aki.
Di su parti, aerolinea Wingo, cu lo cubri e trayecto Bogota-Caracas ta continua confirma pa realisa su prome vuelo den medio di reestablecemento di relacionnan comercial, politica y economico entre Colombia y Venezuela.
