Mediante un comunicado di prensa e siman aki, Aeropuerto Reina Beatrix a informa cu e aerolinea Britanico cu tabata operando na Aruba, ta stop su servicionan. E ultimo vuelo ta bay ta diadomingo proximo, 30 di maart.
E aerolinea “a tuma e decision dificil pa descontinua su servicionan pa Aruba,” aeropuerto a indica. “Aruba a haci tur loke tabata posible pa sostene e operacionnan” di e aerolinea. Segun aeropuerto, a pesar cu tin “interes evidente” na Inglatera, e ta keda dificil pa converti e interes ey den reservacionnan continuo.
“Aruba ta keda comprometi pa explora e oportunidadnan den futuro den e mercado Europeo y di Inglatera, y lo sigui traha riba otro destinacionnan for di e mercadonan Europeo como tambe di” Latino America, e comunicado a finalisa expresando.
