Ayera tardi, presidente di Parlamento Ady Thijzen a ofrece un conferencia di prensa pa expresa cu pueblo a keda pendiente diabierna ultimo pa e reunion publico na unda nan tabata trata e mocion di desconfiansa contra minister Lopez-Tromp.

Thijzen a expresa cu den su funcion e mester ta obhetivo. “Ami a sinti na e momento ey for di minister Lopez-Tromp cu e ta di acuerdo pa sinta na mesa, pero ma keda asombra cu dia despues el a bay Hulanda back te 10 di augustus.”

Thijzen a comenta cu diferente fraccionnan di partido tabata kier pa e reunion sigui dilanti, pero cu minister Lopez-Tromp tin contacto for di Hulanda cu prome minister Evelyn Wever-Croes, ken den un carta a declara cu lo lag’e yega back y e ora ey e ta bay purba di yega na otro. Pero, “e problema aki ta problema di POR”, Thijzen a bisa.

Tambe el a menciona cu su persona como presidente di Parlamento lo yama na un reunion, cu e mes ta bay dicidi ki dia, pero cu e lo laga sa cua ta e miho momento pa asina duna un chens pa minister Lopez-Tromp por ta den Parlamento. “Psobra esey ta un principio di bon gobernacion.”

El a considera importante pa trece dilanti cu den e discurso di minister Lopez-Tromp el a menciona “cierto cosnan” di corupcion y cierto cosnan iregular cu ta pasando,e cual tin cu trece dilanti duidelijk. Pa motibo cu esun cu a actua contra ley of a comete actonan iregular mester por responsabilisa nan mes.

“Nos tin obligacion pa ta transparente pa trece claridad pa pueblo di Aruba” Thizen a specifica.

Tocante e di biahe di minister Lopez-Tromp despues di e reunion publico, Thijzen a bisa: “Mi tambe tin yiu y cu tur respet mi ta bisa pa mi yiu cu mi tin compromiso cu pueblo, e por a warda un par di dia y nos por a pone e reunion mes pa un par di dia.”

Di loke ta trata e palabranan di parlamentario Allan Howel, cu den reunion publico a comenta “Of Marisol Lopez ta baha of gobierno ta cay”, a puntra Thijzen cua ta su impresion di e declaracionnan. El a comenta: “Ssi gobierno mester cay, ta cay”, pa motibo cu tur partido mester goberna, pero pueblo a scoge na 2017 un coalicion. Den cierto momento tin diferencia cu otro, pero mester yega na otro.

Di mesun manera, el a trece dilanti cu e no ta kere cu mester acepta cosnan si kier keda den coalicion. E ta kere cu prome minister Wever-Croes ta haciendo su best pa motibo cu “hopi hende ta lubida cu nos ta den un calamidad y cos aki ta e problema di un partido y cada un di nan mester carga nan responsabilidad. Esun cu bira politico, mester compronde cu e cos aki no ta pa semper. Nos a yega momento cu si un eleccion mester bin, ‘so be it’”, Thijzen a finalisa.