“Mi ta keda duna mi contribucion na comunidad, cu mi partido MEP,” miembro di MEP y actual Presidente di Parlamento Juan ‘Ady’ Thijsen a bisa na Bon Dia Aruba, mientras cu e tabata saluda votadonan na urna electoral 56.
Retiro Gobierno y fraude
E sospecho cu Allan Howell lo a comete fraude cu fondonan pa sosten di su fraccion, fondonan destina pa paga trahadonan tabata motibo pakico Gobierno a entrega su retiro, y Thijsen a bisa cu esaki no ta un tarea di Presidente di Parlamento pa controla. “E ta fundacion separa y cada fraccion ta carga responsabilidad p’e. Hopi hende den fundacion mester sa cu si ta asumi tarea den fundacion mester carga responsabilidad. Cada Parlamentario mester asumi responsabilidad pa decisionnan.” No solamente mester produci cuentanan anual, pero esakinan ta controla pa Meldpunt Ongebruikelijke Transacties, MOT, cu ta rekeri cautela.
Les pa Parlamento
Presidente di Parlamento y candidato nr 13 riba lista di MEP ta kere cu e siguiente Parlamento mester traha a base di e principio cu interes general mester ta na prome luga, riba interes partidario y despues interes personal. Como tal, si tin un Minister ta actua robes y tin prueba pa tal, mester denuncia. Thijsen a haci esaki netamente contra Marisol Lopez Tromp kende e tabata Minister pa MEP. “Pero no por denuncia pa denuncia, djis pa loco. Mester ta responsabel y bon documenta. Pueblo kier bon gobernacion.”
COHO y Hulanda
Pa loke ta condicionnan di Hulanda pa reforma aparato publico pa asina reduci gasto di personal y tambe acepta e rijkswet COHO, Ady Thijsen tabata hopi cla. Ta trata aki di un negociacion entre ambos pais y cu no ta Hulanda so ta determina. Raad van State a duna fraccion di MEP rason cu e concepto di rijkswet COHO ta bay mucho leu y ta pa e motibo aki, Secretario di Estado Raymond Knops mester a cuminza di nobo. “Hecho ta cu mester tin consenso. Aruba mester duna di su parti pa e reformanan, pero e ta cuestion di negociacion. Nos mester yega na otro. Mester corda cu Parlamentarionan tin e ultimo palabra.” Su sugerencia ta pa bin cu un Conferencia di Mesa Rondo pa discuti tur e problemanan cu tin na tur e paisnan y entre e paisnan di Reino Hulandes, y asina yega na consenso.
Coalicion
Lider di MEP Evelyn Wever Croes a bisa di ta habri pa un coalicion atrobe, pero no cu partido AVP. Ady Thijsen ta bisa cu di su banda ta kere cu mester por traha cu tur partido na interes di comunidad. “Semper mester keda habri. Ta pueblo ta dicidi si ta bin coalicion of ta bin un Gobierno mayoritario.” En todo caso, ayera mainta, Thijsen tabata convenci cu MEP lo haya 12 asiento y lo forma un Gobierno su so.
