ORANJESTAD – Den e Business event di aña pasa, Setar a tene un presentacion encuanto di avancenan di tecnologia y kico tur ta spera nos den e proximo decada. E aña aki SETAR a organisa e Business event den e mesun trend y a concentra riba e efectonan di tecnologia riba e manera di haci negoshi den futuro.
Roland Croes, director di Setar, a papia di desaroyonan importante na Aruba y den e mundo di telecomunicacion. A pesar di tur e cambionan y retonan Setar a logra mantene un ganashi aceptabel. Roland Croes a bisa tambe cu ta danki na e transformacion haci den e compania y e esfuersonan pa tuma decisionnan necesario ta pone cu Setar ta y lo keda den e bon direccion. Setar den cuadro cu e efectonan cu ta regarda inteligencia artificial y otro aspectonan di tecnologia moderno a invita un orador cu ta un experto den e efectonan cu e tecnologia moderno tin den tereno laboral y den comercio.
“Trahadonan no mester tin miedo di Inteligencia Artificial mescos cu nos antepasadonan tabata tin miedo di mecanisacion y electricidad. Tur esey a cambia nos manera di traha den nos trabou, pero el a duna nos mas oportunidad tambe y no a tuma nos luga como trahado. Esaki lo pasa e biaha aki tambe.” – segun Byron Reese
E orador invita Byron Reese a papia e aña aki encuanto e efectonan di tecnologia riba e mundo di ‘retail’. Sr. Reese ta un ‘futurista’ cu mas di 25 aña di experiencia den tecnologia. El a lanta varios compania den e areanan tecnologico y tin diferente patente riba tecnologianan nobo den area di Inteligencia Artificial. E ta un personahe multifacetico y den un manera unico sr. Reese a splica e retonan y alabes e oportunidadnan cu lo surgi den futuro pa trabounan y efectonan di tecnologia riba e mundo di ‘retail’.
E ta escritor di varios buki cu ta explora e mundo tecnologico di mañan y na un manera special sr. Reese a logra deleita e audiencia cu su presentacion yen di energia y vitalidad.
Segun Reese: “E problema di mas grandi di mañan ta cu lo no tin un cantidad di desempleo sinembargo un demanda pa hende cu por haci uzo di e bentananan y tur e oportunidadnan cu e tecnologia ta bay ofrece.” – Byron Reese
Reese ta di opinion cu den mundo di futuro ta bay tin mester di trahadonan cu diferente habilidad pa uza tecnologianan di futuro pa hisa e productividad y efectividad den compania. “Tecnologia ta continua di transforma e luga di trabou. Esey ta sigur. Pero e lo bay haci e humanonan mas valioso.”
“Trahadonan no mester tin miedo di Inteligencia Artificial mescos cu nos antepasadonan tabata tin miedo di mecanisacion y electricidad. Tur esey a cambia nos manera di traha den nos trabou, pero el a duna nos mas oportunidad tambe y no a tuma nos luga como trahado. Esaki lo pasa e biaha aki tambe.” segun Byron Reese
