E prome añanan di Organo Ehecutivo AZV ta wordo considera esunnan mas turbulento unda tabata tin hopi discusion tocante e contractonan y casonan den corte. Dentro di tur e discusionnan’ aki tabata lubida e motibo principal pakico a institui AZV, esta e accesibilidad di cuido medico pa tur hende y dentro di esaki, e ampliacion di cuido medico specialisa.

Awendia por conta cu mucho mas specialista medico compara cu 18 aña pasa. Pa duna algun ehempel di loke a wordo mehora desde AZV. Introduccion di servicio di ambulance y wondenpoli na Instituto Medico San Nicolas. Pa yuda aseguradonan cu complicacionnan di malesanan cronico manera diabetes, hipertension of sobrepeso morbido, AZV a percura pa den 2005 introduci e proyecto piloto di ‘gastric bypass surgery’, cual despues den 2006 a wordo regula y cu te cu dia di awe ta un apoyo enorme pa aseguradonan cu tin mester di e tipo di tratamento aki.

Varios specialista medico
Den 2007 a introduci e specialisacion di psikiatria pa mucha. Tambe a amplia cu specialista di wowo den Instituto Medico San Nicolas. Ta habri un Centro Diabetico, special pa guia y maneha e malesa di diabetes. Den 2009 AZV hunto cu Vrije Universiteit van Amsterdam, Hulanda ta introduci e estudio di specialisacion pa Dokter Di Cas aki na Aruba mes.

E trayecto di estudio aki a continua te dia awe. Ta introduci tambe e ‘intensivist’, esta e specialistanan den cuido intensivo. Den 2010 ta amplia medicina interna, sigui na 2011 pa introduccion di specialistanan di medicina geriatrico, esta specialistanan pa cuido di hende grandi. Den 2012 AZV ta introduci e implante cochleaire incluyendo e cuido y guia despues di operacion di e implante (implante special pa persona cu nace sordo). Den mesun aña AZV hunto cu Stichting Wit Gele Kruis ta introduci tambe e praktijkondersteuners cerca e dokternan di cas. Esakinan ta enfermeronan specialisa den guia na pashentnan cu malesanan cronico manera diabetes y presion halto.

Cardiologia Intervencionista
Pa hopi aña cardiologonan mester a manda cierto casonan exterior pa haya cuido cardiologico avansa. Por ehempel pa catherisacion di curason (CAG-diagnostico). Sin embargo, riba iniciativa di nos propio cardiologo dokter Casper Laclé, a pusha y sigui cu e idea pa trece cardiologia intervencionista na Aruba. Awor ta un realidad.

Aruba por disfruta di su propio departamento di cardiogia intervencionista na Dokter Horacio Oduber Hospital. Na inicio di AZV (2001) por corda con un grupo di pashentnan cu e malesa di reuma tabata pidi pa trece reumatologonan na Aruba. E tempo aya, AZV su cifranan tabata mustra cu esaki lo no ta posibel. Cierto specialismonan ta asina caro cu e inversion lo no ta posibel. Awor e ta un realidad: reumatologia a haya su propio departamento na Dokter Horacio Oduber Hospital.

Mas specialismo cu antes

Y asina por sigui menciona varios otro specialismo cu den transcurso di e añanan a wordo introduci, entre otro e ampliacion di oncologia, e ampliacion di gyneacologia, a introduci dokter pa rehabilitacion, a trece dokternan di pulmon, a trece infectiologonan, a trece dokternan specialisa den cuido di hende grandi, a trece nefrologonan (specialista di malesanan di riñon) y e introduccion di specialista di stoma, tripa y higra. Cu e meta pa sigui bay dilanti y yuda Aruba, AZV ta percura pa traha cu specialistanan di afo tambe, kendenan regularmente ta yega nos isla pa duna e.o. conseho. Ta referi akinan na specialistanan manera cardiologo di mucha, medico microbiologo di Corsow, genetista clinico, epileptologo (neurologo specialisa den e malesa di epilepsia) y e schisisteam (team di specialista pa muchanan cu a nace cu un spleet den lip of spleet den cachete of den nan shelo di boca) di Hulanda. AZV ta sigui traha riba e desaroyo di cuido medico di calidad pa Aruba.