Practicamente full e luna di september ta dedica na pashentnan cu tin un malesa di curason y personanan cu tin un riesgo halto pa haya un malesa di curason den futuro. Como AZV, nos tambe ta aporta na informacion con pa evita e riesgo di haya malesanan di curason of en todo caso con pa haci e riesgo mas chikito.

Kico ta bo curason?
Bo curason ta e tamaño di bo man (forma di mokete) y ta e musculo mas fuerte di bo curpa. Un curason ta cuminsa bati 3 siman despues di concepcion. Dia cu bo ta haci 70 aña bo curason a bati 2.5 biyon biaha. Cada bati di curason ta pomp e sanger rond den e curpa, pushando e for di e camber robes den e arteria te cu e ta yega na e bloedvaten mas chikito den henter e curpa. Ora e curpa ta tuma e oxigeno y nutriente di e sanger, e ta bay via e ader bek pa e camber drechi di e curason. Riba su caminda bek pa e curason, e sanger ta pasa na e higra cu ta filtra e sanger y ta kita e partinan cu no ta bon.

Daño riba curason
E sistema ta uno tremendo, pero ta hopi vulnerabel. Cosnan manera huma sigaria, come insaludabel of stress ta haci bo curason daño. Tambe ta posibel cu un persona nace cu un malesa cardiaco. Ora cierto funcion di bo curason ta wordo afecta nos ta yam’e un malesa di curason, esaki ta un termino amplio pa describi cualkier trastorno den e sistema cardiaco.

Atake di curason
Con bo ta ripara si bo ta haya un atake di curason? Tin atakenan di curason cu ta pasa diripiente y ta intenso, tin atake di curason cu bo ta ripara mesora. Pero mayoria di atakenan di curason ta cuminsa poco poco, cu un tiki dolor of molester. Regularmente e persona mes no sa exactamente kico a pasa y ta warda mucho tempo pa busca ayudo. Akinan tin un par di señal cu por mustra cu tin un atake di curason ta andando:

  • Molester den pecho. Cu mayoria di ataca di curason ta presenta un molester den e centro di e pecho cu ta dura mas cu un par di minuut of cu ta bin y bay. E por sinti manera un presion incomodo, manera ta wordo primi.
  • Molester den otro area den e parti superior di curpa. Sintomanan por inclui dolor of molester den un of tur dos brasa, lomba, nek, cachete of bariga.
  • Dificultad pa hala rosea cu of sin molester di pecho.
  • Otro señalnan por inclui sodo friu, color di cuero di cara ta bira bleek, nausea of mareamento.