Oferta pa haci inversion, posiblemente fraudulento, den crypto via rednan social. Evita di bira victima di un scam.
Banco Central di Aruba (BCA) a tuma nota di ofertanan pa haci inversion den Bitcoin y otro monedanan crypto cual ta posiblemente fraudulento. Ta ofrece e inversionnan aki na personanan na Aruba via Instagram y otro rednan social. E proveedornan aki ta priminti rendimentonan irealisticamente halto y ademas ta haci uso ilegal di logonan di algun banco comercial di Aruba.
Mester tene cuenta tambe cu e balor di monedanan crypto ta altamente volatil y p’esey inversionnan den moneda crypto ta altamente speculativo.
Monedanan crypto pa un gran parti no ta regula na Aruba. Pa e motibo ey BCA ta recomenda pa ta hopi cauteloso ora un persona ta priminti rendimento irealisticamente halto den inversionnan den monedanan crypto. E posibilidad di bira victima di un fraude ta sumamente halto ora cu bo ta deal cu personanan of entidadnan cu no ta regula y cu ta ofrece rendimentonan di inversion irealisticamente halto.
Via Instagram, un (grupo di) persona bao di e nomber di usuario “gerboth_f_williams_” actualmente ta agresivamente ofreciendo oportunidadnan di inversion den Bitcoin, primintiendo rendimentonan irealisticamente halto y haciendo uso ilegalmente di e logonan di Aruba Bank y Caribbean Mercantile Bank en particular. E (grupo di) persona aki ta dirigi su mes specificamente na e mercado di Aruba. BCA ta sospecha cu e ta un scam.
CBA ta desconseha pa haci uso di e servicionan aki, tambe pasobra e ta entidad cu no ta regula. Evita di bira victima di un scam!
