Un advertencia di presidente Irani, cu forsanan Europeo den Medio Oriente por ta den riesgo si nan pais uni e campaña di presion Mericano contra e Republica Islamico a pone enfoke riba miles di tropa stranhero den e region.
Reino Uni, Francia y Alemania a pasa lunanan purbando di preserva e acuerdo nuclear di 2015, despues cu presidente Mericano, Donald Trump unilateralmente a bandona esaki na 2018. Pero diamars, Union Europeo a inicia un mecanismo di resolucion di disputa pa purba trece Iran bek den cumplimento despues cu Teheran abiertamente a cuminsa viola restriccionnan ultimo berano.
Iran ta bisa cu no mester ta mara na e acuerdo ya cu Merca a impone sancionnan fuerte. Despues cu un atake aereo na Irak a asesina un general top Irani, Iran a responde lansando misil balistico riba tropanan Mericano staciona na e pais. Den e atake di misil no tabatin ningun herido.
“Awe, e soldaat Mericano ta den peliger, mañan e soldaat Europeo por ta den peliger”, presidente Hassan Rouhani a bisa durante un reunion di gabinete sin elabora.
Paisnan Europeo tin tropa na Afghanistan, Irak, y otro luganan den Medio Oriente, unda nan ta opera hunto cu tropanan Mericano mas grandi. Iran ta alia cu gruponan poderoso arma na Irak, Siria, Libanon y Yemen.
Un bista di presencia militar Europeo:
Irak
Reino Uni, Francya y Alemania ta parti di e coalicion lidera pa Merca cu ta luchando contra e grupo Estado Islamico (IS). Reino Uni tin alrededor di 400 tropa basa na Irak, mientras Alemania tin casi 450 tropa pa combati IS y train forsanan Iraki. Alemania ‘temporalmente’ a retira 35 di su tropanan for di Irak despues di asesinato di general Irani, Qassem Soleimani dia 3 di januari ultimo den un atake cu drone Mericano. Mayoria a bay na Jordan, unda Alemania tambe tin tropa participando den reconnaissance y refuel vuelo pa e coalicion anti-IS. Francia tin alrededor di mil tropa den e region pa yuda combati IS na Irak y Siria.
Union Europeo como bloc tin varios decena di personal na Baghdad trahando riba reforma den sector di seguridad y consehando Ministerio di Interior. Vocero di Comision Europeo, Peter Stano a bisa cu oficialnan ta na altura di e menasa, pero cu ‘nos, como UE, no ta bandonando Irak’.
Golfo
Reino Uni ta opera un base naval na Bahrain cu por aloha te cu 500 personal militar Britanico y ta enfoca riba seguridad maritimo. Tambe tin un base di training conhunto na Oman. Francia tin un base naval conoci como Camp Peace na Port Zayed na Abu Dhabi, cu ta sede di alrededor di 700 tropa Frances. Reino Uni y Francia tambe tin tropa den basenan Mericano den e region.
Afghanistan
Mision di NATO na Afghanistan ta consisti di alrededor di 17mil tropa di 38 pais aliado y partner. E aliansa formalmente a conclui su mision di combate na fin di 2014 y ta provee conseho y training na forsanan Afghano. Reino Uni tin casi mil tropa na Afghanistan y Alemania tin alrededor di 1,100.
Libanon
Varios pais Europeo ta contribui forsanan na e mision di peacekeeping di Nacionnan Uni den sur di Libanon, cu ta patruya e frontera tenso entre Israel y e grupo militante Hezbollah, cu tin sosten di Iran. Francia ta contribui alrededor di 700 tropa. Alemania ta provee mas di 100 forsa na e mision maritimo di peacekeepers.
