E conferencia nacional convoca pa ministro encarga cu asunto di adulto mayor a resulta den un convenio cu a haya firma di un cantidad considerable di entidad relevante pa e sector, ademas di gremio y sindicato, pa traha riba un politica di maneho integral pa e tema aki. Esey ta mustra un bon inicio pa logra algo positivo, y hopi necesario, pa loke ta e añanan nos dilanti.

Den un anterior Editorial e siman aki nos a referi caba na e factornan general di e situacion demografico den cual nos ta actualmente. Esaki ta encera tanto e fenomeno di enbehecimento como esun di ‘dejuvenation’ pa cual nos no tin un termino adecuado na Papiamento, pero cu ta e fenomeno di un caida structural di e cantidad di nacemento, cu consecuencia serio pa comunidad a largo plazo.

E actual convenio ta encera atencion mayoritariamente pa e aspectonan di problema individual y colectivo cu e poblacion di edad avanza ta encontra. Den e lista di topico publica cu razon por mira como punto di atencion e asunto di condicion di bida y vivienda. E ultimo aki ta requeri atencion urgente y di caracter mas amplio cu solamente e problema di capacidad adecuado di facilidad pa atende persona di edad cu no por biba riba nan mes mas, ni den algun forma di colectividad cu por ehemplo nan famia. Ora nos ta discuti asunto di vivienda pa e grupo aki, nos no por keda sin atende e aspecto di urbanizacion en general. Kico ta e problema anto? Segun nos opinion nos tin un problema serio di urbanizacion cu a crece bay pa varios decada caba den direccion robez, unda cada vez a ocupa mas tereno costoso y valioso pafor di e centronan urbano tradicional, unda e ultimonan aki a keda na merced di decadencia comercial y habitacional, sin cu te awe tabatin un contesta contundente pa e problema aki. E situacion dentro di e casco urbano di tanto Oranjestad como San Nicolas ta exigi un plan di recuperacion cu ta bay hopi mas leu cu djis e atencion pa reactivacion di e funcion comercial di e centronan aki. Kico esaki tin di haci cu e problema di vivienda pa hende di edad? No ta recomendable pa comete e eror di planifica proyecto di vivienda leu for di centro di ciudad, simplemente pasobra por haya tereno mas facil pasobra esaki ta tereno publico unda gobierno por dicidi riba su mes cu ta pone esaki disponible. Esaki ta parce bunita pero ta hinca atrobe e persona di edad den un isolacion, mientras cu haci vivienda pa persona mayor un parti di repoblacion di centro di ciudad un beneficio pa tanto e grupo mes como pa e meta general di rehabilitacion di centro di ciudad. E otro parti problematico di e asunto aki ta cu gobierno en general no tin un plan di vivienda, contando cu iniciativa priva ta resolve tur cos. Esey no por ta asina, ni den e paisnan cu recurso grandi, manera Hulanda, vivienda ta algo cu ta resolve ‘por arte de magia’ . Ey tambe estado ta hunga un papel importante den atende disponibilidad di vivienda, pasobra tin un parti di poblacion considerable cu no por adquiri un vivienda riba nan mes. Den nos situacion e situacion ta hopi mas grave, cu mas di dos tercera parti di poblacion cu no por bay banco pa pidi hipoteca, si acaso mes cu nan logra haya un tereno pa construi. Mira di e angulo aki nos ta considera cu esaki ta un di e terenonan mas urgente unda no tin un maneho mes di parti gubernamental. Claro cu esaki ta bay hopi mas leu cu un convenio, iniciativa di e mandatario encarga cu asunto di persona di edad avanza, pero cu lo mester haya apoyo di e demas ministerionan cu mester percura pa maneho y proyecto concreto, den proyecto general di rehabilitacion di centro urbano, y di integracion di vivienda pa anciano den esakinan.

Facilmente un lector cu bon observacion lo ripara cu nos comentario no ta toca primeramente e aspectonan di e situacion individual di salud y cuido di e grupo aki. Esey tin su motibo; e atencion di cualkier proyecto te awor ta bay mas tanto den e direccion ey, sin atencion la loke nos ta trata aki, mientras cu nos ta considera esakinan di sumo importancia pa por tin exito den cualkier iniciativa a largo plazo.

Finalmente e asunto di financiamento di cualkier iniciativa cu por propone. E contesta rapido di banda gubernamental lo ta cu ‘no tin placa’… Si esey atrobe, y ainda, ta e respuesta, anto nos por pasa pa disolve cualkier iniciativa pa trece comunidad hunto pa dialoga y consulta, pasobra nunca lo yega na algo concreto. Awor, nos sa cu gobierno den ultimo decada practicamente no por a dedica un parti sustancial di su entrada na inversion, pa e situacion financiero penoso crea pa e propio gobierno(nan). Por ehemplo, desde 2015 te 2022 ningun aña tabatin mas di Afl. 35 miyon riba presupuesto pa inversion, cu mas di mil miyon florin presupuesta en total… Nos mester tene cuidao cu e debenan cu mester paga no bira e pretexto pa no haci nada, mientras ta nenga di admiti cu ta pesey e reorganizacion y austerizacion den aparato gubernamental ta asina importante pa por inverti, y cu e no ta solamente mahadera di Hulanda y algun supuesto contrincante local. Por ultimo, un nota positivo: a dicidi cu e consulta lo reporta cada tres luna tocante avance logra. Ta di spera cu ta cumpli tambe cu e tarea di transparencia publicando e reportenan aki.