Durante su biahe di trabao na Hulanda den luna di november 2023, Minister di Finanzas, Xiomara Maduro, hunto cu director di Aduana, Sr. Ricky Croes a reuni cu Director General encarga cu Aduana na Hulanda, Sra. Nanette van Schelven.
Meta di e bishita tabata pa haci un peticion pa asina por haya asistencia y sosten necesario di Aduana Hulandes pa por fortifica y profesionalisa Aduana na Aruba. Banda di esaki, Minister Maduro a haya e oportunidad pa cera conoci cu e teamnan di maneho di Aduana cu a reuni cu otro den cuadro di e programa ‘Versterking Grenstoezicht’ den Reino Hulandes.
Segun un comunicado di gobierno, a honra e peticion di Maduro, y den cuadro di e proyecto di ‘Versterking Grenstoezicht’ e team di maneho di Aduana di Aruba lo ricibi e sosten necesario di e experto di Aduana, Sr. Jan Kamp kende cu ya caba den e prome siman di aña 2024 a cuminsa cu e trabaonan necesario pa fortifica y profesionalisa e Cuerpo di Aduana na Aruba.
Maduro ta gradici e ekipo di Aduana Hulandes lidera pa Sra. Nanette van Schelven pa e bon reunion y e cooperacion pa brinda asistencia tecnico na bienestar di Aduana di Aruba.
