Sistema di recompensa ta un tecnica di modificacion di conducta hopi utilisa cu educacion infantil Ta trata di establece un conducta cu lo kier incorpora pa e comportamento di e mucha, pa siña y pa haya stimulacion.

Durante un entrevista special cu Bon Dia Aruba a tene cu Adrielle Geerman, docente y trahado social di Teachers’ Platform Aruba, el a splica cu nan ta mira enseñansa como un sistema holistico, caminda e parti academico, social y tambe emocional no por wordo mira los di otro.

Pa e motibo aki, Geerman a bisa cu Teachers’ Platform Aruba ta brinda informacion ariba tereno di educacion, pero tambe social y emocional na educadornan, mayornan y alumno/studiantenan.

Mirando cu e alumno/studiante ta pasa mayoria di su tempo na cas y na scol, a scoge pa traha cu e ‘driehoek systeem’. Esaki ta nifica cu scol, cas y e alumno ta wordo mira como uno completo y p’esey mester influencia tur tres partido pa logra mas cu ta posibel pa cu e desaroyo di e alumno/studiante.

Banda di esaki, Geerman a expresa cu Teachers’ Platform Aruba ta brinda informacion di e ultimo desaroyonan den enseñansa. Por pensa riba curriculum, acercamento den klas, tecnologia y mucho mas. Nos ta bibando den un mundo dinamico cu continuamente ta den desaroyo y enseñansa sigur tambe ta parti di esaki.

Sistema di recompensa, cu na Hulandes ta wordo yama “beloningssysteem”, ta un sistema caminda e conducta desea di e mucha ta wordo stimula. Tin tambe di e situacion actual di enseñansa na Aruba y tambe lo tin un over di concentracion na cas ora di traha tarea digital. Tambe tin algun tip pa docentenan mes, pa haya e manera con nan por comunica mas facil cu studiantenan.

Asina mes, Geerman a señala cu e sistema aki por wordo usa na tur caminda y tambe por wordo usa desde cu e mucha ta hopi chikito. Mester adapta esaki pa e edad. Por ehemplo, muchanan cu mester bira “zindelijk” mayornan por usa esaki cu e mucha caba y e por bay te cu hende grandi mes. Tambe el a sigura cu ta existi algun trabou cu ta ofrece esaki pa nan empleadonan.

Importante ta pa duna recompensa na medida y ta duidelijk pa cua conducta e recompensa aki ta wordo duna. Si ta desea di duna un cumplido como recompensa, ta importante pa e cumplido aki ta specifico, por ehemplo: “Mi ta wak con bo a caba di traha tur bo matematica y hasta bo a skirbi nechi cu pen e biaha aki.” Pa un mucha esaki tin hopi mas balor cu un “hopi bon!”, pa motibo cu e mucha lo ripara cu a pone atencion na e cos “specifico” ey cu e la haci su best p’e. Si a bis’e “hopi bon” tin chens cu por ehemplo e siguiente biaha e lo djis traha tur som so y no skirbi nechi.

Banda di e sistema di recompensa ta hopi importante pa por ehemplo:

1.Mayor demostra e conducta cu ta desea, muchanan ta siña hopi mas lihe di e ehempel cu nan mes ta haya.

2. Papia di sentimento, puntra e mucha con e ta sinti, pero como mayor tambe tin cu bisa con abo ta sinti.

3.Mantene regla (realistico) concreto. Esaki ta nifica tambe cu tur hende mester ta ariba un liña cu otro, regla ta brinda siguridad y structura. Si no ta consecuente, e mucha lo no sa kico ta spera di dje.

4.Comunica efectivo, ta importante pa menciona locual cu kier wak den conducta di e mucha pa e sa kico ta spera di dje. Por ehemplo, en bes di bisa “bo ta haci cos di mal manera” ta mas efectivo pa bisa “siguiente biaha saluda ora bo drenta door di bisa bon dia”.

5.Esaki ta hopi importante: Percura pa conoce e desaroyo di e mucha individual pa asina keda realistico den kico ta spera di dje, no tur mucha ta desaroya ariba tur tereno mesun lihe. Ta importante pa stimula, pero no mester forsa desaroyo di un mucha. Cada mucha ta diferente.

Pa finalisa, Geerman a trece dilanti cu durante e temporada di crisis aki cu e mucha ta na cas, ta importante pa keda brinda structura, structura ta brinda siguridad y e mucha lo ta hopi mas trankil si e ta sinti sigur. Tambe por scoge por ehemplo, pa traha un rooster pa e mucha di tal forma cu e sa kico ta spera di dje durante dia. Ariba e rooster ta importante pa tin espacio pa su lesnan, come, tarea di cas y descansa pero tambe pa hunga y asina sigui desaroya su mes ariba otro terenonan cu e tin interes p’e.