Dialuna ultimo, Agencia pa Desaroyo y Recurso Asistencial Aruba (ADRA) a ofrece un conferencia di prensa pa duna di conoce e proyectonan cu nan ta haciendo den comunidad Arubiano, como tambe donacion di paketenan di cuminda pa esunnan mas vulnerabel den comunidad.

Rachela Dirksz, relacionista publico a comenta cu Agencia Humanitario di Iglesia Adventista Mundial ta esun cu ta yuda tur esunnan cu tin mester. Nan tin proyectonan pa yuda e comunidad mas deplorabel cu mester di un ayudo den diferente forma, por medio di actividadnan pa asina e personanan por ricibi asistencia.

ADRA Aruba ta forma parti di ADRA International, un organisacion dedica pa duna asistencia. Algun di e proyectonan cu nan a bin haciendo ta exposicionnan di salud, na unda cu e ciudadanonan por ricibi informacion tocante salud. Tambe nan a organisa un curso di cushina saludabel, na unda comunidad por ricibi asesoria con pa haci recetanan saludabel. Di mesun manera nan a organisa un ‘Thanksgiving’ pa esunnan cu tin menos recurso y cu no tin hogar.

Di esaki, Dirksz el a menciona cu mas di 100 persona a ricibi un ayudo. Tambe el a bisa cu nan tin proyectonan di plantacion na unda cu comunidad por cera conoci e plantanan di Aruba y su uso medicinal.

Actualmente, ADRA Aruba tin e proyecto di mayornan hoben cu a cuminsa na luna di september di 2019. Nan ta ricibi diferente curso pa asina nan por sigui cu bida di studiante of por drenta bek den e bida laboral. Tambe Dirksz a informa cu aña pasa nan a haci un recaudacion di fondo pa Bahamas.

Alcidra Jansen-Richardson, director di ADRA a trece dilanti cu na e momentonan aki pa via di Covid-19 hopi hende a keda afecta, y pa e motibo aki diferente NGO y gobierno ta duna yudansa pa esunnan cu tin mas necesidad. Pero semper tin algun grupo cu pa un motibo of otro no ta bin na remarca of no ta haya un ayudo.

Di e grupo aki, Jansen a splica cu ADRA ta enfoca riba dje y nan a presenta un plan pa duna paketenan di cuminda of tambe voucher. El a specifica cu pa via di ADRA International nan a haya e sosten financiero pa por ehecuta e plan aki, cu ta trata un proyecto di tres luna, den cual nan ta purba di cubri por lo menos 450 famia.

E famianan tin e opcion di scoge entre e pakete of voucher cu nan por cambia den un supermercado pa cumpra loke nan mester, cu ta regarda cuminsa so.

Jansen a declara cu e motibo pakico nan ta haci esaki, ta pa via di un investigacion cu a wordo haci y cu a duna e resultado cu e necesidad t’ey. “Ta existi un necesidad enorme bou di un grupo grandi y p’esey nos a dicidi di yena e buraco ey.”

Desde cu nan a cuminsa ofrece e ayudo nan a yuda aproximadamente 285 famia entre paketenan di comestibel y voucher den tur districto di Aruba.

E condicionnan pa ricibi un saco di comestibel of un voucher ta cu e personanan no mester ta hayando yudansa caba di un of otro organisacion como tampoco di FASE. Un persona cu a keda afecta pa via di Covid-19, por ehemplo un persona cu no tin contracto di trabou ni un payslip di salario. Di esaki el a remarca cu tambe ta existi personanan cu a inscribi pa FASE, pero nan no a haya e ayudo ainda, e personanan aki por bin na remarca pa e ayudo.

Pa por aplica, e persona interesa por yama pa e number di telefon 736-7347 of 584-0777 of por skirbi riba nan pagina di Facebook ADRA Aruba pa duna tur e dato y por yena e formulario cu nan tin.