Diamars cu a pasa Fiscalia di Chile a revela cu un mucha homber di 13 aña, cu a ser acusa di viola un mucha muhe di cinco aña na ciudad sur di Temuco, a muri. El a ser tortura durante diesdos hora pa 4 hende adulto y finalmente el a ser asesina pa asfixia cu un saco.
E crimen a conmove henter pueblo di Chile, ora cu e fiscal Rigoberto Garrido a trece un informe di Servicio Medico Legal unda ta revela cu e mucha muhe no tin señal di a sufri ningun violacion.
“E test sexocologico di e victima ta bisa cu e no a presenta lesion di banda genital, cu por ta compatibel cu un violacion” Garrido a bisa na tur e periodistanan.
Tribunal di garantia di La Araucania na sur di Chile a dicidi mantene den prizon preventivo Johana Mora Villagran, Pablo Morales Correa, Abraham Bravo Palma y Victor Chanqueo Mora, kendenan a ser presenta na Fiscalia pa motibo di homicidio califica.
E mucha homber a permanece diesdos hora mara riba un stoel, unda el a ricibi hopi golpi cu un martio, despues el a ser tortura te momento cu e mayornan di e mucha muhe, supuesto victima, a procede pa asfixia e mucha homber cu un saco y un cusinchi, segun declaracion di un prizonero.
E fiscal a splica cu tur cuatro prizonero a participa den crimen
“ Un di nan a facilita e luga unda e mucha homber a ser maltrata, otro prizonero a participa na agresion y finalmente e mayornan di e mucha muhe a participa den e homicidio. E accion comun aki ta cu tur 4 tabatin boluntad pa maltrata e mucha homber.
E fiscal a bisa cu e mucha homber tabata mara bao cuido di un di e prizoneronan ey y e no a dune ningun ayudo. E hoben a haya hopi golpi y a presenta hopi lesion y fractura den su cara”. Dialuna ultimo autoridad a haya e curpa di hoben aki.
E mucha homber cu a ser asesina tabata drumi den Servicio Nacional di Menor (Sename), pero durante dia e tabata bende calender den bus of restaurant di ciudad di Temuco.
