WASHINGTON — Administracion di Obama a viola ley federal, door di faya pa tuma den consideracion e impacto riba cambio climatico di lease tereno publico pa bora pa oil y gas na Wyoming, segun un hues federal a bisa diamars.
Pero e decision di e corte Mericano pa districto di Columbia tambe por presenta un menasa legal pa e agenda di presidente Trump pa expande boramento di azeta y gas, y mineria di carbon, a traves di e terenonan y awa publico di e nacion. Esey pasobra e decision ta conta como un mapa, cu por wordo uza pa reta centenares di lease di administracion di Trump tambe.
Sinembargo, segun expertonan, mientras e decision lo por hiba na retrasonan legal pa e expansion di boramento di Trump, door di mara nan den litigacion, no ta mucho probabel cu lo para esaki completamente.
E decision diamars di hues Rudolph Contreras, cual ta aplicabel specificamente na un plan, di tempo di Obama, di e departamento di Interior su Bureau di maneho di tereno pa lease varios miles di hectarea pa boramento na Wyoming, tambe a conclui cu e agencia tabata rekeri legalmente pa considera e impacto climatico di tur e benta di lease pa desaroyo di combustibel fosil.
Den su decision, hues Contreras a skirbi cu, bou e National Environmental Policy Act di 1970, agencianan federal ta rekeri pa considera y cuantifica e efecto di e posibel emision di gas invernadero asocia cu e combustibel fosil cu lo ser extrai for di e benta di e lease aki. Ya caba, e ley ta rekeri gobierno federal pa considera e efectonan ambiental riba e sitio di boramento pa gas y azeta, manera contaminacion di awa, y e efecto di construccion di caminda riba matanan y animal.
E Bureau of Land Management a protesta cu ‘lo rekeri pa identifica cualkier proyecto mundial cu lo emiti gas invernadero den pasado, presente, y futuro rasonablemente predeci’, cual lo ta un campo di analisis ‘imposibel’.
Hues Contreras a skirbi cu e agencia ta corecto cu e ley ‘no ta rekeri lo imposibel’. Pero el a skirbi, “BLM no a cuantifica adecuadamente e impacto riba cambio climatico di lease pa azeta y gas.”
En general, e proposicion pa benta di lease di administracion di Trump a inclui menos analisis di impacto climatico cu esunnan di Obama cual tabata e enfoke di e decision di hues Contreras.
Expertonan a bisa cu e rekerimento di hues Contreras no tabata particularmente dificil. “No ta un calculacion cu ta consumi bo tempo”, sr. Revesz, di Universidad di New York, a bisa. “E ta basa riba un model cu ya ta existi.”
“E corte ta bisando, bo mester bay bek y tira un miho bista riba impacto climatico” a bisa Harry Weiss, un experto den ley di recurso natural na Ballard Spahr. “Pero nan tambe ta biusando, si nan haci un bon trabou den esaki, e ora ey nan por bay bek pa bora.”
