(AP)—E administracion di presidente Mericano Joe Biden lo yuda 50 pais identifica y responde na malesanan infeccioso, cu e meta pa preveni pandemianan manera e brote di Covid-19 cu a para bida normal rond mundo na 2020.
Oficialnan di gobierno lo ofrece apoyo den e paisnan, mayoria di nan localisa den Africa y Asia, desaroya miho testing, control, comunicacion y preparacion pa brotenan asina den e paisnan ey. E strategia lo yuda “preveni, detecta y responde efectivamente na menasanan biologico unda cu nan surgi,” Biden a bisa den un declaracion diamars.
E Global Health Security Strategy, e presidente a bisa, ta diseña pa proteha hende mundialmente y “lo haci Merca mas fuerte, mas safe y mas saludable cu nunca prome durante e momento critico aki.”
E anuncio tocante e strategia ta bin mientras paisnan no a logra yega na un acuerdo global riba respuestanan pa pandemianan den futuro. Cuatro aña despues di e pandemia di coronavirus, e prospectonan di un trato di pandemia firma pa tur 194 di e miembronan di e Organisacion Mundial di Salud ta fracasando.
E administracion di Biden ta plania pa move dilanti cu un strategia nobo pa prepara mundo pa e proximo pandemia, no importa si a yega na un trato of no, segun oficial mayor di administracion a conta reporteronan dialuna.
E programa di Merca lo depende riba varios agencia gubernamental—incluyendo e U.S. State Department, e Centers for Disease Control and Prevention (CDC), Health and Human Services y e U.S. Agency for International Development, of USAID—pa yuda paisnan mehora nan respuesta contra malesa infeccioso.
Congo ta un pais unda trabao a cuminsa caba. E gobierno Mericano ta yudando Congo cu su respuesta na un brote di mpox virus, incluyendo cu inmunisacion. Mpox, un virus cu ta den e mesun famia cu esun cu ta causa viruela, ta crea blaarnan doloroso riba cuero. OMS a declara mpox un emergencia global den 2022, y tin mas cu 91,000 caso plamando den mas cu 100 pais te awo.
E cas blanco a publica ayera un website cu e nombernan di e paisnan cu ta participando den e programa. Oficialnan di Biden ta buscando pa 100 pais registra pa e programa pa fin di aña. Merca a duna biyones di dollar, incluyendo placa for di donacion priva, na e esfuerso. Biden ta puntrando pa 1.2 biyon dollar pa esfuersonan di salud global den su propuesta di presupuesto anual pa e congreso Mericano.
