(AP) – E administracion di Biden a bisa dialuna cu e gobierno tin intencion di provee 1.5 biyon dollar na e compania di chip di computer GlobalFoundries pa expande su produccion domestico na New York y Vermont.
E anuncio ta e tercer premio cu tin sosten financiero directo pa un compania di semiconductor bao e 2022 CHIPS and Science Act. E ley aki ta permiti e gobierno inverti mas di 52 biyon dollar den revitalisa e fabricacion di chip di computer na Merca ademas di avansa investigacion y desaroyo. “E chipnan cu GlobalFoundries lo crea den e facilidadnan nobo aki ta esencial,” Secretario di Comercio Gina Raimondo a bisa den un yamada cu reporteronan. “Nan ta duna poder na ekiponan militar sofistica, vehiculonan electrico, entre otro. Nan ta sigura cu smartphone tin e funcionnan mas recien y ta facilita conexion di internet mas lihe pa Mericanonan.”
Ademas di fondo directo, gobierno tambe lo provee prestamo cu balor di te hasta 1.6 biyon dollar cu un combinacion total di inversion publico y priva cu ta igual na mas o menos 12.5 biyon dollar.
GlobalFoundries tin e intencion di usa e fondo pa yuda paga pa e construccion di un fabrica di chip avansa nobo na Malta, New york, pa aumenta produccion di su planta existente na Malta como parti di e acuerdo strategico cu General Motors y revitalisa cu e su planta na Burlington, Vermont.
E proyecto ta premira di crea 1,500 trabao di fabrica y 9,000 trabao di construccion durante e proximo decada. Como parti di e termino di e trato, 10 miyon lo keda dedica na train empleadonan y GlobalFoundries lo extende su subsidio di 1,000 dollar pa cuido di mucha y depositonan di sosten pa cuido di mucha na e empleadonan di construccion.
Cu un eleccion grandi e aña aki cu ta pone control riba e Cas Blanco y Congreso riba e mesa, e salud di e economia Mericano ta un preocupacion serio. Legisladornan Republicano a enfatisa cu inflacion a yega su punto mas halto den aña 2022 y esaki a causa dano na e poder di compra di famianan, un punto di presion inmediato cu a causa daño na President Joe Biden su aprobacion. Sinembargo e Democratanan a enfatisa nan esfuersonan pa alivia inflacion y nan inversionnan di termino largo cu segun nan lo motiva crecemento, ademas di e inversionnan den produccion di chip y infrastructura.
